Санхүүжилтийг “Баян хөндий” төслийн хөгжүүлэлтэд түлхүү зарцуулна

“Эрдэнэ Монгол” компани “Баян хөндий” алтны төслийг ашиглалтад оруулах эргэлтийн хөрөнгийн хүрээнд Худалдаа Хөгжлийн банктай зээлийн гэрээ байгууллаа. Тодруулбал: Торонто, Монголын Хөрөнгийн биржид давхар бүртгэлтэй “Erdene Resource Development” компани Худалдаа Хөгжлийн банкнаас 50 сая ам.долларын эргэлтийн хөрөнгийн зээл авахаар тохиролцсон байна.

Тус компани “Mongolian Mining Corporation”-той хамтран хөгжүүлж буй “Баян хөндий” алтны төслийнхөө бүтээн байгуулалтыг эрчимжүүлж, ашиглалтад оруулахад дээрх санхүүжилтийг түлхүү зарцуулах юм байна.

“Erdene Resource Development” компани ирэх оны дунд үеэс анхны алтаа гарган авах зорилготой ажиллаж байгаа бөгөөд 2025 оны III улиралд алт олборлолтоо тогтвортой явуулахыг зорьж байгаа аж.

24 сарын хугацаатай, жилийн 13.3 хувийн хүүтэй энэхүү зээл нь алт олборлохоос өмнөх бэлтгэл ажилд нь ихээхэн туслалцаа үзүүлэхээр байгааг “Erdene Resource Development”-ийн Гүйцэтгэх захирал Петер Акерлэй мэдэгджээ.

Үүнээс гадна тус компани "Зуун мод" орд буюу молибдений төслийн хөгжүүлэлтэд шаардлагатай таван сая канад долларын варрантыг хэрэгжүүлэхээр болсноо тайландаа дурдлаа. Үүнд “Erdene Resource Development”-ийн гол хөрөнгө оруулагчдын нэг Эрик Спротт оролцож байгаа юм байна.