Ерөнхий сайд Г.Занданшатар ДЦС-III-ын нөхцөл байдалтай танилцаж байна.
Тэрбээр, “Би Ерөнхий сайдаар томилогдсоныхоо маргааш эрчим хүчний салбарт тулгамдаад байгаа асуудлыг анхаарч эхэлсэн. Тодорхой үүрэг даалгавар өгсөн. Үүнийхээ хэрэгжилтийг шалгаж явна. ДЦС-III дээр онцгой дэглэм тогтоож, Засгийн газрын БЭТ-өөр Н.Тавинбэхийг мэргэжлийн хүн гэдэг утгаар нь томилсон. Эрчим хүчний салбарын хэмжээнд өндөржүүлсэн бэлэн байдал тогтоож, өвөлжилтийн бэлтгэл ажлыг хангах шаардлага тавьсан.
БЭТ ажиллах хугацаандаа төсөв, санхүүгийн зарцуулалт, бараа ажил үйлчилгээ худалдан авах ажиллагаанд хууль хяналтын байгууллагатай хамтран шалгахыг ЗГХЭГ-т, дэмжлэг үзүүлэхийг Эрчим хүчний яаманд даалгасан.
Бусад эх үүсвэрүүд хэрхэж байгаа талаар Эрчим хүчний сайд, Эрчим хүчний зохицуулах хороо анхаарах шаардлагатай байна. Тосонцэнгэлийн ДЦС-ын II блокийг ашиглалтад оруулах, Бөөрөлжүүтийн цахилгааны станцын II блокийг энэ онд багтаан нээх, Эрдэнэбүрэнгийн УЦС-ын нээлтийг найм, есдүгээр сард амжуулах зэрэг ажлуудыг анхаараарай. Тавдугаар цахилгаан станц миний мэдэхээр 20 жил гацлаа. Гацсан олон төслүүдийн ард дандаа ашиг сонирхлын зөрчлүүд байсан шүү. Шат шатанд гацаадаг, мөнгө төгрөг нэхдэг. “Эрчис Монгол”-ын хийсэн судалгаагаар илүүдэл орон тоо их байна. Гэхдээ цомхотголд ажлаа хийж яваа инженер, техникийг ажилтнууд өртөх ёсгүй.
Эрчим хүчний болон бусад дагалдах хуулиудаа дахин сайн боловсруулж, Засгийн газарт танилцуулах хэрэгтэй. Эрчим хүчний салбар дахь данхар бүтэц, үр ашиггүй зардлаа бууруулж, энэ сарын 30-ны дотор ЗГ-т танилцуул.
Гурван сарын дараа шалтаг тоочих, мөнгө нэмж авах, ажил дуусаагүй гэсэн асуудлыг хүлээж авахгүй шүү. Энэ өвөл хүн ард минь даарахгүй, хөлдөхгүй өвөлжих ёстой” хэмээлээ.
BY
П. Урнаа
Утга зохиол судлаач, сэтгүүлч мэргэжилтэй. Сэтгүүл зүйн салбарт найм дахь жилдээ ажиллаж байна. Eguur.mn сайтын улс төрийн албаны модератор, редактораар ажиллаж байна.

Нийтэлсэн огноо2025-07-16