Алтанбулаг боомтоор орж ирсэн ОХУ-ын иргэдийн тоо 450 хувиар өсөөд байна
Энэ долоо хоногт Кремлиэс дайчилгааны шаардлагыг хангасан эрчүүдийн хилээр гарахыг хориглоно гэсэн таамаг гараад байна
Цэргийн хэсэгчилсэн дайчилгаа зарлах ОХУ-ын Ерөнхийлөгч Владимир Путины мэдэгдлийн дараа олон эрчүүд, гэр бүлүүд эх орноо орхихоор яарч буй тул өнгөрсөн амралтын өдрүүдэд ОХУ-ын хөрш орнуудын хилийн боомтуудын ачаалал эрс нэмэгджээ. Москвагийн гол нисэх буудал болон Казахстан, Гүрж, Монгол зэрэг улсын хил дээр ОХУ-ын иргэдийн маш урт дараалал үүсээд байгааг эх сурвалжууд мэдээлж байна.

Үүний зэрэгцээ энэ долоо хоногт Кремлиэс дайчилгааны шаардлагыг хангасан эрчүүдийн хилээр гарахыг хориглоно гэсэн таамаг гараад байна. Холбооны аюулгүй байдлын алба буюу ФСБ-ээс зэвсэгт хүчний байгууллагын тушаалаар зарим эрчүүдийг хил дээрээс буцааж эхэлсэн тухай дайчилгааны ажилд зөвлөхөөр оролцож буй хуульч Павел Чиков өөрийн “Telegram” хуудастаа мэдээлжээ.

Мөн энэ мягмар гарагт Украины эзлэгдсэн бүс нутгуудыг ОХУ-д нэгтгэх санал асуулга дууссаны дараа цэргийн насны эрчүүдэд хилийн хориг тавих гэж байгаа тухай мэдээллийг нэрээ нууцалсан хоёр эх сурвалжаас авснаа ОХУ-ын хараат бус мэдээллийн сайт “Медуза” болон Кремлийн бодлогыг шүүмжлэгч Михаил Ходорковскийн хэвлэлийн групп дурджээ.

Үүнээс гадна Владимир Путины дээрх шийдвэрийг эсэргүүцсэн жижиг хэмжээний жагсаал цуглаан ОХУ-ын олон хотод болсон байна. Ням гарагийн оройны байдлаар 35 хотод болсон жагсаал цуглааны үеэр цагдаа нар 828 хүнийг баривчлаад байгааг хүний эрхийн “OVD-Info” байгууллага мэдээллээ.

Дагестаны Бүгд Найрамдах улсад цагдаа нар дайчилгааг эсэргүүцсэн жагсаалыг тараахын тулд агаарт хий буудаж байгааг харуулсан дүрс бичлэгийг “Коммерсант” сонин цахим хуудастаа оруулжээ.

Дайчилгаа эхэлснээс хойш ОХУ-аас гарах иргэдийн урсгал нэмэгдсээр байна. Тухайлбал: Финландын зүүн хилийн боомтоор орж ирсэн иргэдийн тоо долоо хоногийн дотор хоёр дахин нэмэгдэж, баасан гарагт 7700, бямба гарагт 8572 хүрсэн нь тус улсын Хил хамгаалах байгууллагын тоо баримтаас харагдаж байна.

Мөн Казахстан улсын хойд хилийн боомтуудаар нэвтрэх гэсэн иргэдийн авто цуваа найман км орчим үргэлжилж, боомтоор гарахад дунджаар 15 цаг зарцуулагдаж буйг иргэд мэдээллээ. Харин Гүрж улсын хил дээр 10 км урт дараалал үүсэж, иргэд бараг 24 цаг хүлээсний эцэст боомтоор гарч байгааг “Bloomberg”-т ярилцлага өгсөн ОХУ-ын нэгэн иргэн онцолжээ.

Харин Монгол Улсын хойд хил дээрх нөхцөл байдлын талаар Алтанбулаг боомттой холбогдож тодруулахад есдүгээр сарын 25-нд буюу ням гарагт тус боомтоор дамжин ОХУ-ын 984 иргэн орж ирснийг мэдээлсэн юм. Энэ нь есдүгээр сарын 15 буюу 10 хоногийн өмнөхтэй харьцуулахад 450 хувиар өссөн үзүүлэлт болж байна.

Харин Боршоо, Цагааннуур, Алтанбулаг зэрэг Монголын хойд хилийн 10 боомтоор есдүгээр сарын 19-25-ны хооронд ОХУ-ын 7978 иргэн нэвтрээд байгааг Хил хамгаалах ерөнхий газраас мэдээллээ.

Нийтэлсэн огноо2022-09-28