2023-2024 онд Монгол Улсын эдийн засгийн өсөлт дунджаар 6 хувь байна гэж Дэлхийн банк тооцоолж байна
Дэлхийн банк Монгол Улсын эдийн засгийн 2022 оны өсөлтийн төсөөллөө 2.5 хувиас 2.4 хувь болгон буурууллаа. Харин 2023-2024 онд эдийн засгийн өсөлт дунджаар зургаан хувь байна гэж тооцоолж байна.

Хилийн боомтын саатал, дэлхийн эдийн засгийн өсөлт сулрах төлөв, импортын хүнс, шатахуун, бордооны үнийн өсөлт зэргээс шалтгаалан 2022 онд Монгол Улсын эдийн засаг 2.4 хувиар л өснө гэж Дэлхийн банк тооцоолжээ.

Хэдий тийм боловч эдийн засгийн төлөв цаашид Украины дайн сунжрах, БНХАУ COVID-19-ийг үл тэвчих бодлогоо үргэлжлүүлэх, өндөр хөгжилтэй орнуудын мөнгөний бодлогын төлөв хүлээлтээс илүү эрчимтэй чангарах зэрэг хэд хэдэн эрсдэлт хүчин зүйлсээс хамаарахыг тодотгож байна. Эдгээр хүчин зүйлсээс хамааран Монгол Улсын төлбөрийн тэнцэл муудах, төсвийн алдагдал нэмэгдэн бодлогын орон зай улам хумигдах, инфляцын дарамт эрчимжих эрсдэлтэй байгаа аж.

Тиймээс Монгол Улс дотооддоо макро эдийн засгийн тогтвортой байдлыг хадгалах шаардлага нэмэгдэж байгааг Дэлхийн банк онцолж байна.

Тухайлбал: төсвийн арга хэмжээг зорилтот бүлэгт чиглүүлснээр дэлхийн эдийн засгийн өсөлт саарч, эрсдэл хуримтлагдаж буй энэ үед төсвийн тогтвортой байдлыг сайжруулахын зэрэгцээ бодлогын орон зай бий болгоход ач холбогдолтойг мэдээллээ.

Харин 2023-2024 онд “Оюутолгой” төслийн гүний уурхай ашиглалтад орохтой холбоотойгоор эдийн засгийн өсөлт эрчимжиж зургаан хувьд хүрнэ гэж үзэж байна.

Үүнээс гадна БНХАУ-ын эдийн засгийг хасаж тооцвол Дэлхийн банк Зүүн Ази, Номхон далайн бүс нутгийн хөгжиж буй орнуудын эдийн засаг 2022 онд 5.3 хувь хүрч өснө гэж тооцоолжээ.

Бүс нутагт сэргэлтээрээ тэргүүлж байсан БНХАУ-ын өсөлт 2022 онд 2.8 хувь хүрэх төлөвтэй гэж Дэлхийн банк тооцоолсон байна. Энэ нь 2021 оны 8.1 хувийн өсөлттэй харьцуулахад огцом буурах үзүүлэлт юм.

Зүүн Ази, Номхон далайн бүс нутгийн дотоодын нийт бүтээгдэхүүний өсөлт 2021 онд 7.2 хувь байсан бол энэ онд 3.2 хувь болж саарах төлөвтэй байна. Харин ирэх онд 4.6 хувь хүрч эргэн сэргэх төлөвтэй байгаа аж.

"Бодлого боловсруулагчид инфляцыг барих эсвэл эдийн засгийн сэргэлтийг дэмжих хоёрын хооронд сонголт хийх болж байна. Дэлхийн эдийн засгийн өсөлт удааширч буй энэ үед улс орнууд урт хугацааны хөгжилд саад болохуйц бодлогын доголдлуудаа шийдвэрлэх нь зүйтэй” хэмээн Дэлхийн банкны Зүүн Ази, Номхон далайн бүсийн Ахлах эдийн засагч Аадитя Маттоо онцолж байна.

Нийтэлсэн огноо2022-09-28