УУХҮЯ: Нүүрсний экспортын гүйцэтгэл эхний 9 сарын байдлаар 104.5 хувьтай байна

Оны эхний есөн сарын байдлаар Монгол Улс 18.8 сая тонн нүүрс экспортлоод байгааг Уул уурхай, Хүнд үйлдвэрийн яам мэдээллээ.

Энэ нь өмнөх оны мөн үеэс 52 хувиар өссөн дүн төдийгүй, нүүрсний экспортын гүйцэтгэл төлөвлөгөөнөөс давж биелээд байна.

Хэдийгээр өмнөх онтой харьцуулахад өсөлттэй байгаа ч цар тахлын өмнөх үе буюу 2018, 2019 онтой харьцуулахад нүүрсний экспортын биет хэмжээ бараг 10 сая тонноор бага байна.

Энэ онд 35 орчим сая тонн нүүрс экспортлохоор төлөвлөж байсан ч төсвийн тодотголоор нүүрсний экспортын зорилтот хэмжээг бууруулж, 18 сая тонн болгосон юм. Ингэснээр экспортын гүйцэтгэл оны эхний есөн сарын байдлаар 104.5 хувьтай байна.

Монгол Улс өнгөрсөн онд 15.6 сая тонн нүүрс экспортолсон бол энэ онд боомтуудын нөхцөл байдал сайжирч, экспорт нэмэгдсэнээр 20 гаруй сая тонн нүүрс экспортлох боломжтой байгаа юм.

Хэдий тийм боловч Төрийн өмчит болон томоохон нүүрсний компаниуд төлбөрөө урьдчилж авах нөхцөлтэй экспорт хийснээр, мөн тээврийн зардал өссөнөөр төлбөрийн тэнцэлд нөлөө нь төдийлөн мэдрэгдэхгүй байна.