Хадгаламж, зээлийн хоршоодын дунд ногоон санхүүжилтийн талаарх мэдээлэл дутмаг байна.Цаг агаар, улирлын таатай бус байдал, ажиллах хүч болон хөнгөлөлттэй санхүүжилт дутмаг байгаа нь байгальд ээлтэй ногоон санхүүжилтийг хэрэгжүүлэхэд гол сорилт болж буйг Санхүүгийн зохицуулах хорооны Хадгаламж, зээлийн хоршоодын дунд явуулсан судалгаа харууллаа.

Энэхүү тайланд ногоон санхүүгийн бүтээгдэхүүн, үйлчилгээний төрөл, нөхцөл, хэмжих үзүүлэлтийг тодорхойлох талд хадгаламж зээлийн хоршоодод мэдээлэл хүргэх, сургах шаардлагатай гэж дүгнэсэн байна. Түүнчлэн үр дүнг үнэлэх бодлого журмын зохицуулалт дутагдалтай байгааг тодотгов.
Үүнээс гадна Хадгаламж, зээлийн хоршоодын удирдлагын 71 хувь байгальд ээлтэй ногоон санхүүжилтийн талаар мэдлэг, мэдээлэлтэй гэж хариулсан байна. Нөгөө талд 2022 оны дүнгээр 24 хадгаламж, зээлийн хоршоо нийт 1.4 тэрбум төгрөгийн санхүүжилт олгосон нь энэ чиглэлийн санхүүжилт сул байгааг илтгэж байгаа юм.

Ногоон төслүүдийг тодорхойлох, тэдгээр төслүүдэд хөрөнгө оруулах шийдвэр гаргахад тавигдах шалгуур байхгүй, бусад бүтээгдэхүүнтэй харьцуулахад ногоон зээлийн ашиг тусын талаар мэдээлэл бага гэсэн хариултыг ихээр ирүүлснийг тайланд дурджээ.

Судалгааны үр дүнд үндэслэн цаашид байгальд ээлтэй ногоон санхүүжилтийг бодлогоор дэмжих, жендерийн мэдрэмжтэй мэдээллийн сан байгуулах зэрэг ажлыг үйл ажиллагаандаа тусгаж ажиллахыг чиглэл болгосныг Санхүүгийн зохицуулах хороо мэдээлсэн байна.

Нийтэлсэн огноо2023-06-07