Монгол Улс оны эхний таван сард 3.46 тэрбум ам.долларын бараа, бүтээгдэхүүн гаднаас худалдан авчээ.2023 оны эхний таван сарын байдлаар гадаад худалдааны нийт бараа эргэлт 9.76 тэрбум ам.доллар хүрч өссөн талаар Гаалийн ерөнхий газар мэдээллээ. Энэ нь сүүлийн гурван жилд буюу Covid-19 цар тахал эхэлснээс хойших ижил хугацаанд хамгийн өндөр дүнд тооцогдож байна.
Монгол Улс оны эхний таван сард 6.3 тэрбум ам.долларын бараа, бүтээгдэхүүнийг олон улсын зах зээлд гаргасан бол 3.46 тэрбум ам.долларын бараа, бүтээгдэхүүн гаднаас худалдан авчээ. Ингэснээр Монгол Улсын төлбөрийн тэнцлийн урсгал дансны гол хэсгийг бүрдүүлдэг барааны худалдааны данс 2.84 тэрбум ам.долларын ашигтай гарсан байна.

Экспортын орлогын 57.5 хувийг нүүрсний орлого, нэг тэрбум ам.долларыг зэсийн баяжмалын орлого дангаараа бүрдүүлсэн бөгөөд уул уурхайн гол түүхий эдийн экспортын дүн 5.75 тэрбум ам.доллар хүрч байна.

Үүнийг БНХАУ-д нийлүүлсэн нүүрсний хэмжээ сүүлийн гурван жилийн дээд түвшинд хүрч 23.1 сая тонн болсон, зэсийн баяжмал 0.63 сая тонн болж өссөнтэй холбон тайлбарлаж байгаа юм.
Импортын хувьд нийт үнийн дүнгийн дийлэнх хэсгийг бүрдүүлж байсан удаан эдэлгээтэй барааны үнийн дүн харьцангуй буурсан ч нефтийн бүтээгдэхүүний хэмжээ өссөнийг Гаалийн ерөнхий газар мэдээллээ.

Үүнээс гадна оны эхний таван сард 24 мянга 693 ширхэг суудлын автомашин, 8061 ширхэг ачааны автомашин импортолсон нь өмнөх оны мөн үеэс 6.5.-9.6 хувиар буурсан үзүүлэлт боллоо. Эдгээрийг худалдан авахад 441.8 сая ам.доллар зарцуулсан байна.

Харин нефтийн бүтээгдэхүүний импортод 728.6 сая ам.доллар зарцуулсан нь өмнөх оны мөн үеэс нэмэгдсэн дүн болсныг Гаалийн ерөнхий газар мэдээллээ. Оны эхний таван сарын хугацаанд 279 мянган тонн автобензин, 531.7 мянган тонн дизель түлш худалдан авчээ. Засгийн газар 2023 оны зургаадугаар сар дуустал дизель түлшний орлогын албан татварын хувь хэмжээг тэглээд байгаа юм.

Мөн өнгөрсөн намраас Монгол Улс малын мах, дайвар бүтээгдэхүүн экспортолж эхэлсэн бөгөөд энэ оны эхний таван сард 16.3 мянган тонн хүрч өссөн байна.

Нийтэлсэн огноо2023-06-08