"Монголын Хөрөнгийн бирж" ХК нь "Арилжааны журам" болон СЗХ-ны үнэт цаасыг нийтэд санал болгох ажиллагааг түр зогсоох тухай чиглэлийн дагуу "Улаанбаатар бонд"-ын анхдагч зах зээлийн арилжааны захиалга авах хугацааг түр хойшлуулжээ. Нийслэлийн парк шинэчлэлийн хүрээнд БНСУ-аас оруулж ирсэн автобуснууд стандартын шаардлага хангахгүй байгаатай холбоотой маргаан үүсээд буй энэ үед Улаанбаатар бондын анхдагч зах зээлийн арилжаа тодорхойгүй хугацаагаар хойшиллоо.

Нийслэлээс гаргаж буй хоёр жилийн хугацаатай бондын нэрлэсэн үнэ 100 мянган төгрөг ба 2.7 сая ширхгийг санал болгохоор төлөвлөснийг Монголын Хөрөнгийн бирж мэдээлж байв. Жилийн 17.2 хувийн хүүтэй, таван жил хүртэлх хугацаанд бонд хэсэгчлэн санал болгож, нийт 500 тэрбум төгрөг татан төвлөрүүлэхээр төлөвлөөд байгаа юм.

Бондын татан төвлөрүүлэх хөрөнгийн 35.5 хувь буюу 177.5 тэрбум төгрөгийг агаарын бохирдлыг бууруулахад, 30 хувь буюу 150 тэрбум төгрөгийг Сэлбэ сэргэлт төслийн эхний ээлжийн бүтээн байгуулалтын ажилд, мөн он дамжин хэрэгжиж буй сургууль, цэцэрлэгийн хүртээмжийг нэмэгдүүлэх төсөл, арга хэмжээг дуусгах санхүүжилтэд 45.8 тэрбум төгрөг, инженерийн дэд бүтцийн хүртээмж, авто зам, замын байгууламжийн сүлжээг нэмэгдүүлэх төсөл, арга хэмжээг санхүүжүүлэхэд 14.4 тэрбум төгрөг зарцуулахаар төлөвлөөд байна.

Нийтэлсэн огноо2023-10-03