2023 оны II улирлын байдлаар хөдөлгөөнт банкны хэрэглэгчдийн тоо 6.8 сая болоод байна.Монгол Улсын бэлэн бус гүйлгээний үнийн дүн 2027 он хүртэл жилд дунджаар 18 хувиар өсөх төлөвтэй байгааг Монголбанкны тайланд дурдсан байна. 2022 оны байдлаар улсын хэмжээнд төлбөр тооцооны 90 орчим хувийг бэлэн бус хэлбэрээр хийжээ. Тухайлбал: нийт гүйлгээний 90 хувь нь карт, банкны аппликейшн, гар утас зэрэг цахимаар хийгдэж байгааг Монголбанкны Төлбөр тооцооны газрын захирал ярилцлагадаа дурдаж байсан юм.

Хөдөлгөөнт банкны хэрэглэгчид жил ирэх тусам нэмэгдэж, нийт хэрэглэгчдийн тоо 2023 оны II улирлын байдлаар 6.8 сая хүрчээ. Энэ нь өмнөх оны мөн үеэс 13 хувиар өссөн дүн болохыг Монголбанкны хөдөлгөөнт банкны тайлангаас харж болохоор байна.

Цахимаар хийгдсэн гүйлгээнээс гар утасны апп-аар хийгдсэн гүйлгээ хөдөлгөөнт банкны нийт гүйлгээний 50 гаруй хувийг бүрдүүлж байгаа аж. Үүнээс өргөн хэрэглэгддэг “Qpay” үйлчилгээний хувьд жил ирэх тусам зах зээлд эзлэх хувь нь өссөөр байна. 2022 онд нийт зах зээлийн 4.1 хувийг эзэлсэн бол 2023 онд 6.6 хувь, 2025 онд 11.2 хувь, 2027 онд 12.5 хувийг эзлэх төсөөлөлтэй байна.

Цаашид Монголбанк ч мөн цахим төлбөрийн хэрэглээг нэмэгдүүлэхэд анхаарч байгаа юм. Энэ хүрээнд 2024 он гэхэд үндэсний брэнд “₮” картыг EMV чип рүү бүрэн шилжүүлэхэд банкнуудтай хамтран ажиллах, мөн зах зээлд оролцогчидтой хамтран цахим төлбөрийн бүтээгдэхүүн, үйлчилгээ, хэрэглээний талаар олон нийтийн боловсролыг дээшлүүлэхэд анхаарч ажиллах стратеги баримтлахаа онцолж байв.

Нийтэлсэн огноо2023-11-22