Монгол Улсын Засгийн газрын ам.долларын бондод “Fitch Ratings” байгууллага "B" үнэлгээ өгөөд байна
Монгол Улсын Засгийн газар 2024 онд төлөгдөх 8.75 хувийн купонтой “Хуралдай” бондыг бэлэн мөнгөөр буцаан худалдан авах саналыг хөрөнгө оруулагчдад тавилаа. Ингэснээр Монгол Улсын гадаад өрийн тодорхой хувийг төлөх хугацааг хойшлуулах боломжтой болж байна.

Нийт үлдэгдэл бондын хэмжээ 392.6 сая ам.доллар байгаа бөгөөд Засгийн газраас үнэ, хүүгийн нэмэгдлийн хамт 1000 ам.долларын бондыг 1010 ам.доллароор худалдан авах санал тавьж байгаа юм. Энэхүү санал 11 дүгээр сарын 27-ны өдөр хүртэл хүчинтэй байх ажээ.

Монгол Улсын Засгийн газар шинэ бонд гаргахаар ажиллаж байгаа ч энэ нь “Хуралдай” бондыг буцаан худалдан авах ажиллагаанаас өөр байгаа юм. Мөн шинэ бонд гаргаж, бондын төлбөрийг Засгийн газар хүлээн авснаа дараа буцаан худалдан авах саналыг гүйцэтгэхээр байна.

Үүний зэрэгцээ үнэлгээний “Fitch Ratings” байгууллага 2024 онд хугацаа нь дуусах бондын тендер саналтай холбоотойгоор Монгол Улсын Засгийн газрын ам.долларын бондод "B" үнэлгээ өгч, төлөвийг “Тогтвортой” гэж үзсэн байна. Өөрөөр хэлбэл Монгол Улсын урт хугацааны зээлжих зэрэглэлтэй адил үнэллээ. Харин зэрэглэлд сөргөөр нөлөөлж болзошгүй зүйлс дунд гадаад санхүүжилтийн орчин дордох, Монгол Улсын өр, дотоодын нийт бүтээгдэхүүний харьцаа муудах зэргийг онцолжээ. “Fitch Ratings” үнэлгээндээ Дэлхийн банкны засаглалын үзүүлэлтүүдийг харгалзан үзсэнээ тодотгосон байна.

Монгол Улсын хувьд улс төрийн тогтвортой байдал, авлигын хяналт зэрэг үзүүлэлтээр 46 дугаарт бичигдэж байгаа юм.

Нийтэлсэн огноо2023-11-26