2023 онтой харьцуулахад нүүрсний эрэлт энэ онд харьцангуй тогтвортой байна

Одоогоор нүүрс нь эрчим хүчний гол эх үүсвэр хэвээр байгаа ч ирэх жилүүдээс энэ хандлага эрчимтэй буурна гэж “Bloomberg New Energy Finance”-ийн шинжээч Юми Ким мэдээллээ. Нүүрсний эрэлт оргил цэгтээ хүрэхэд дөхсөн байгаа нь үүнд голлон нөлөөлнө гэж тайлбарласан байна. 2023 онтой харьцуулахад нүүрсний эрэлт энэ онд харьцангуй тогтвортой байна гэж мэдээлжээ.

Хэрэглээгээр тэргүүлэгч БНХАУ сэргээгдэх эрчим хүчний чиглэлд ихээхэн анхаарч буй энэ үед нүүрснээс эрчим хүч гарган авах хандлага нь буурна гэж үзэж байгаа юм.

Үүнээс гадна Энэтхэг болон Зүүн Өмнөд Азийн орнуудын нүүрсний хэрэглээ өсөх төлөвтэй байгааг дурдсан байна. Хэдий тийм боловч дэлхийн бусад орнуудын хэрэглээ энэ хугацаанд буурахаар байгаа тул нөхцөл байдал тогтвортой байна гэж үзжээ.