Монгол Улсын нийт хүн амын 37.1 хувь нь хүүхдүүд байна. Тэдний эрүүл мэнд, боловсрол, хөгжих боломж хот хөдөөд ялгаатай хэвээр байгааг Үндэсний Статистикийн хороо, НҮБ-ын Хүүхдийн сангаас хамтран өрхийн нийгмийн үзүүлэлтийн 2023 онд хийсэн түүвэр судалгаагаар гаргажээ.

Тодруулбал, хөдөөд гурван хүүхэд тутмын нэг нь сургуулийн өмнөх боловсролд хамрагдаж чадахгүй байгаа юм. Мөн дархлаажуулалт, эрүүл мэндийн үйлчилгээ ч хот, хөдөөд ялгаатай байна. Төвийн бүс болон Улаанбаатар хотод дархлаажуулалт сайн байхад Баян-Өлгий аймагт хүүхдийн дархлаажуулалт тааруу байгаа үзүүлэлт гарсныг ГБХНХЯ мэдээлэв.

Иймд тэгш бус байдлыг арилгах, хот, хөдөөгийн хүүхдэд ээлтэй болгох, хүүхэдтэй холбоотой төсөв төлөвлөлтийг сайжруулах, нийгмийн салбар хөрөнгө оруулалтыг нэмэх талаар Засгийн газрын Хэрэг эрхлэх газар, НҮБ-ын Хүүхдийн Сан хамтран "Хүүхдийн эрхийг хангахад орон нутгийн байгууллагын оролцоо, түншлэлийг сайжруулах нь” хэлэлцүүлэг өрнүүлж, Хүүхдийн эрхийн тухай конвенцын хэрэгжилтийг орон нутагт ямар байгаа, хүүхдийн эрхийн зөрчлийг багасгахад үндэсний болон орон нутгийн түвшинд хэрхэн ажиллах талаар ярилцжээ.