Бондын 445.7 тэрбум төгрөгийг төлөвлөгөөний дагуу зарцуулжээ

2024 оны зургаадугаар сард дотоодын зах зээлд нээлттэй хэлбэрээр гаргасан 500 тэрбум төгрөгийн “Улаанбаатар” бондын 445.7 тэрбум төгрөгийг төлөвлөгөөний дагуу зарцуулаад буйг Монголын Хөрөнгийн биржид тайлагнасан байна.

“Улаанбаатар” бондыг Бөөрөлжүүтийн цахилгаан станц, авто зам, замын байгууламжийн засвар, шинэчлэлтийн ажил, ариутгах бохир усны Туул-1 коллектор болон үерийн байгууламжийн бүтээн байгуулалтад зарцуулжээ.

Бондоор татан төвлөрүүлсэн хөрөнгийн 60 хувь буюу 300 тэрбум төгрөгийг Бөөрөлжүүтийн цахилгаан станцад хөрөнгө оруулсан байна. Эрчим хүчний эх үүсвэрийг нэмэгдүүлэх бодлогын хүрээнд Төв аймгийн Баянжаргалан сумын нутагт орших Бөөрөлжүүтийн цахилгаан станцын эхний блок буюу 300 мВт-ын хүчин чадалтай станцыг 2024 онд багтаан ашиглалтад оруулахаар төлөвлөсөн ч эхний ээлжийн 150 МВт-ын барилгын ажил дуусаад байгаа юм.

Авто замын нэвтрүүлэх чадварыг сайжруулахын тулд гол болон туслах, орон сууцны хороолол доторх нийт 27 байршилд, 73.1 км урттай зам, ус зайлуулах хоолойн иж бүрэн бүтээн байгуулалтыг 150 тэрбум төгрөгөөр хийхээр төлөвлөснөөс 141.7 тэрбум төгрөгийг нь 2024 онд зарцуулжээ.

Мөн дөрвөн тэрбум төгрөгийг үнэт цаас гаргах үйл ажиллагаатай холбоотой зардал бүрдүүлсэн байна.