“Эм Жи Эл Акуа” ХК-ийн борлуулалтын орлого 18 хувиар өсөж, 23.6 тэрбум төгрөг болов

“Эм Жи Эл Акуа” ХК 2024 оны цэвэр ашгийн 70 хувийг буюу 2.3 тэрбум төгрөгийг ногдол ашигт хуваарилахаар шийдвэрлэсэн байна. Нэгж хувьцаанд 7.31 төгрөгөөр тооцож ногдол ашиг олгоно. Ногдол ашгийг дөрөвдүгээр сарын 30-ны дотор хувьцаа эзэмшигчдийн дансанд байршуулах аж.

Тус компани 2024 онд 3.4 тэрбум төгрөгийн цэвэр ашигтай ажилласан нь өмнөх оноос 30 гаруй хувиар өссөн дүн болж байна. Борлуулалтын орлого нь 18 хувиар өсөж, 23.6 тэрбум төгрөг болсныг санхүүгийн тайландаа мэдээллээ.

“Эм Жи Эл Акуа” компани өнгөрсөн оны тавдугаар сард IPO хийж, татан төвлөрүүлсэн 15.2 тэрбум төгрөгөөс түүхий эд материал болон үйлдвэрийн тоног төхөөрөмж худалдан авахад 50 гаруй хувийг нь зарцуулаад байгааг тодотгожээ.

Цаашид шат дараатайгаар бүтээгдэхүүнийхээ хуванцар савны жинг бууруулахаас гадна 2028 он гэхэд бүтээгдэхүүнийхээ баглаа боодолд 90 хувь хүртэл дахин боловсруулсан түүхий эд ашиглахыг зорьж байгаа аж.

Тус компанийн хувьцааны ханш IPO хийсэн үеийн түвшинд тогтвортой байна. 52 долоо хоногийн хувьцааны ханш нь 150-191 төгрөг орчимд арилжаалагдсаныг Монголын Хөрөнгийн биржийн арилжааны мэдээллээс харж болохоор байгаа юм.