Монголд анх удаа хийгдэж буй энэхүү нэршлийн гэрээ нь таван жилийн хугацаанд үргэлжилнэ
Дотоодын отгон банк “М банк” “Уранган” групптэй таван жилийн хугацаатай хамтын ажиллагаа эхлүүлж, Монголын сагсан бөмбөгийн дээд лигийн тоглолтууд явагддаг “UG Arena”-ийн нэрийг “M bank arena” болгох нэршлийн гэрээ байгуулжээ. Таван тэрбум төгрөгийн дүнтэй энэхүү хамтын ажиллагаа нь өргөн утгаараа спортайнмент салбараар дамжуулан нийгмийн эрүүл мэндийг дэмжих томоохон хөрөнгө оруулалт болохыг “M банк”-наас онцолсон байна.
Тус ордон “M bank arena” нэртэй болсноор спортайнмент салбарт илүү их сайжруулалт, бүтээн байгуулалт хийх, олон улсын хэмжээний тоглолтууд зохион байгуулах боломж бүрдэж буйг “Уранган” группийн Гүйцэтгэх захирал мөн дурджээ. Нэршлийн гэрээ буюу “Naming Rights” нь дэлхийн хэмжээнд, тэр дундаа АНУ-ын спорт, энтертайнмент салбарт олон тэрбумаар хэмжигдэх зах зээл юм. 2021 онд Лос-Анжелесийн алдарт “Staples Center”-ийг “Crypto.com Arena” болгосон 700 сая ам.долларын гэрээ нь энэ зах зээлийн түүхэнд хамгийн өндөр дүнтэй гэрээ болж байлаа.
“М банк”-ны Гүйцэтгэх захирлын үүрэг гүйцэтгэгч Б.Тэмүүлэн 
“Олон улсад банк, “Arena”-тай хамтарч нэршлийн гэрээ байгуулах хамтралууд түгээмэл хийгддэг. Бид энэ жишгээр Монголд анх удаа “Arena”-ийн нэршлийн гэрээ хийлээ. “М банк” нийгмийн хариуцлагын хүрээнд сагсан бөмбөгийн хөгжлийг бүх түвшинд дэмжсээр ирсэн бол энэ удаагийн хамтын ажиллагааг илүү өргөн хүрээнд нийгмийн эрүүл мэндийг сайжруулах томоохон хөрөнгө оруулалт гэж харж байна. Мэдээж “М банк” салбаргүй, бүрэн дижитал банк учраас “M bank arena” бол манай салбар биш харин харилцагч нартаа чиглэсэн олон давуу тал бий болгох боломж гэж харж байна” гэж онцоллоо.
“Уранган” группийн Гүйцэтгэх захирал Л.Золбоо  
“Уранган группийн хувьд “UG Arena”-д спортайнмент төв гэх тодотголтойгоор спорт, энтертайнментын үйл ажиллагаа, тэмцээнүүдийг олон улсын жишигт нийцүүлсэн, шинэлэг байдлаар хийхийг зорьсоор өнөөг хүрсэн байна. Одоогоос “Arena”-ийн нэршил “M bank arena” болж өөрчлөгдсөнөөр спортайнмент салбарт илүү их сайжруулалт, бүтээн байгуулалт хийх боломж бүрдэж байна. Нэршил өөрчлөгдсөнөөр “Уранган” группийн үйл ажиллагаанд ямар нэгэн өөрчлөлт орохгүй. Мэдээж Монголд анх удаа ийм хэмжээний хамтын ажиллагаа хийгдэж байгаа учраас олон эерэг өөрчлөлт бий болгох үүднээс бидний хувьд баяртай байна” гэж тодотгов.

Нийтэлсэн огноо2025-03-18