2025 он гарсаар Уул уурхайн биржээр арилжаалж буй нүүрсний хэмжээ буурч, төмрийн хүдрийн арилжаа идэвхжиж байгааг МХБ мэдээлэв
Гуравдугаар сар гарсаар 16 удаагийн хэлцлээр нийт 24.6 сая ам.долларын  уул уурхайн бүтээгдэхүүн арилжаалагдсаныг Монголын Хөрөнгийн бирж мэдээллээ.
Үнийн дүнгийн дийлэнхийг буюу 55 гаруй хувийг “Эрдэнэс Тавантолгой” ХК-ийн нүүрсний арилжаа бүрдүүлсэн байна. Энэ сар гарсаар тус компанийн 96 мянган тонн баяжуулсан коксжих нүүрсийг 11 сая гаруй ам.доллароор арилжаалжээ.
Түүнчлэн “Энержи Ресурс” болон “Хангад Эксплорэйшн” ХХК-ийн 64 мянган тонн коксжих нүүрсэнд хэлцэл хийсэн байна. Мөн мягмар гарагийн арилжаанд “Андын илч” компанийн 38.4 мянган тонн чийг багатай хүрэн нүүрсийг 6.9 сая юаниар арилжаалсан аж.
Үүнээс гадна “Монголросцветмет”-ийн 105.6 мянган тонн төмрийн хүдэр, баяжмалыг 8.6 сая ам.доллароор арилжаалсныг Монголын Хөрөнгийн бирж мэдээллээ.
2025 он гарсаар Уул уурхайн биржээр арилжаалж буй нүүрсний хэмжээ буурч, төмрийн хүдрийн арилжаа идэвхжиж байгааг Монголын Хөрөнгийн бирж мэдээлж байсан юм.
Цаашид нүүрсний борлуулалтыг нэмэгдүүлэхийн тулд Уул уурхайн бүтээгдэхүүний биржийн тухай хуулийг шинэчлэх шаардлага тулгарч байгааг Аж үйлдвэр, Эрдэс баялгийн сайд тодотгож байлаа.

Нийтэлсэн огноо2025-03-19