Улаанбаатар улсын нийт эрчим хүчний хэрэглээний 60 гаруй хувийг бүрдүүлдэг. Эрчим хүчний системд дунджаар 1245 МВт ачааллыг “үүрэлцдэг” юм.
2023-2024 онд шилжих өвөл Улаанбаатарын эрчим хүчний систем 200 МВт чадлын дутагдалд орсныг энэ өвөл нөхөж байна. Бөөрөлжүүтийн 150 МВт цахилгаан станц, Багануурын 50 МВт батарей хуримтлуурын станц 2024 оны арванхоёрдугаар сараас төвийн системд эрчим хүч нийлүүлж, дутагдалтай хэрэглээг нөхжээ.
Багануурын батарей хуримтлуурын станц нэг МВт.ц эрчим хүчийг 15.6 центээр нийлүүлдэг. 2025.03.19-ний байдлаар нэг ам.доллар 3473 төгрөгтэй тэнцүү байна. Тэгэхээр тус станц нэг МВт.ц эрчим хүчийг 541 төгрөгөөр нийлүүлж байна.
Энэ нь Сэргээгдэх эрчим хүчний тухай хуульд заасан, нар салхинаас үйлдвэрлэх эрчим хүчнээс илүү үнэ юм.
Тус хуулийн 11 дүгээр зүйл. Сэргээгдэх эрчим хүчний үнэ, тариф бүлэгт
Салхины эрчим хүчний үүсгүүрээр үйлдвэрлэж нийлүүлэх 1 кВтц цахилгаан эрчим хүчийг 0.085 ам.доллар хүртэл;
5000 кВт хүртэл хүчин чадалтай усан цахилгаан станцын үйлдвэрлэж нийлүүлэх 1кВтц цахилгаан эрчим хүчийг 0.045-0.06 ам.доллар;
Нарны эрчим хүчний үүсгүүрээр үйлдвэрлэж нийлүүлэх 1 кВтц цахилгаан эрчим хүчийг 0.12 ам.доллар хүртэл үнээр нийлүүлнэ гэжээ.
Энэ сарын 8-ны өдрийн байдлаар Багануурын батарей хуримтлуурын станц төвийн системд 17692.9 МВт.ц эрчим хүч нийлүүлжээ. Нийт 275 995 ам.долларын үнэ бүхий эрчим хүч нийлүүлсэн байна.
Батарэй хуримтлуурын станц байгальд ээлтэй, ногоон эрчим хүчийг үйлдвэрлэж, шөнийн цагт хуримтлуулсан эрчим хүчийг оргил ачааллын цагаар буцаан нийлүүлдэг. Энэ технологи өндөр өртөгтэй тул 15.6 центээр эрчим хүч нийлүүлдэг гэв. 
Тэгвэл Казахстанд дуудлага худалдаагаар сэргээгдэх эрчим хүчний төслүүдийг зарласаар одоо тус улсад үнэ нь 2.4 цент болж буурчээ. Харин манай Сэргээгдэх эрчим хүчний тухай хуульд заасан үнүүд бусад улсуудынхаас өндөр хэвээр байна. Иймд 2020 оноос хойш Эрчим хүчний яам сэргээгдэх эрчим хүчний шинэ зөвшөөрөл олгоогүй юм.

Нийтэлсэн огноо2025-03-19