БНСУ-ын Засгийн газрын буцалтгүй тусламжаар Монгол Улс, БНСУ-ын хамтарсан ховор металлын судалгааны төв байгуулна
БНСУ-ын Засгийн газрын буцалтгүй тусламжаар Монгол Улс-БНСУ-ын хамтарсан Ховор металлын судалгааны төв байгуулах төслийг хэрэгжүүлж эхэлснийг УУХҮЯ мэдээллээ. Төслийг 3-5 жилийн хугацаанд хэрэгжүүлэх бөгөөд нийт 9.7 тэрбум вон буюу 6.9 сая ам.долларын санхүүжилт хийх юм байна.

Энэхүү төслийн хүрээнд шинжилгээ болон баяжуулалтын тоног, төхөөрөмжүүд нийлүүлэх, мэргэжлийн боловсон хүчин бэлтгэх, ашигт малтмал, уул уурхайн чиглэлээр суралцаж буй оюутнуудыг Солонгос улсад Магистр болон Докторын хөтөлбөрт хамруулах зэрэг ажил хийнэ гэж БНСУ-ын Геологийн шинжлэх ухаан, эрдэс баялгийн хүрээлэн /KIGAM/ онцолсон юм.

Монгол Улсын хувьд одоогоор ховор металлын судалгаа хийх тоног төхөөрөмж, боловсон хүчин хомсдолтой байгааг "Геологийн судалгаа шинжилгээний төв" ТӨҮГ мэдээлж байв.

БНСУ-ын Засгийн газрын буцалтгүй тусламжаар "Геологийн судалгаа шинжилгээний төв" ТӨҮГ-ыг түшиглэн байгуулах Ховор металлын судалгааны төвийн гүйцэтгэгчээр Солонгосын Геологийн шинжлэх ухаан, эрдэс баялгийн хүрээлэн ажиллаж байна.

БНСУ-аас Монгол Улсад суугаа Онц бөгөөд Бүрэн эрхт Элчин сайд Ким Жун Гү

“Монгол Улс, БНСУ-ын хамтарсан Ховор металлын судалгааны төв нээгдэж байгаад их баяртай байна. Энэхүү төв нээгдсэнээр Монгол Улс-БНСУ-ын харилцаанд чухал ач холбогдолтой. БНСУ лити, графит зэрэг ховор металлуудаар цэнэг хураагуур үйлдвэрлэдэг. Цаашид хувийн хэвшлийн хөрөнгө оруулалт улам нэмэгдэж, хоёр орны хоорондын эдийн засгийн харилцаа илүү хөгжиж, идэвхэжнэ гэж найдаж байна”

БНСУ-ын Геологийн шинжлэх ухаан, эрдэс баялгийн хүрээлэнгийн төслийн Ерөнхий менежер Чон Хү Сок

“БНСУ-ын дэвшилтэт технологийн үйлдвэрлэлийн хүрээнд ховор металлын хэрэгцээ их байдаг. Манай улсын дэвшилтэт технологийн хөгжил бусад улс оронтой харьцуулахад өндөр түвшинд байгаа. Харин Монгол Улс ховор металлын нөөц баялаг ихтэй. Гэхдээ түүнийгээ нийлүүлэх зах зээл, боловсруулах шатны технологи байхгүй. Эсрэгээрээ БНСУ-д ховор металлын хэрэгцээ шаардлага их.

БНСУ-ын хувьд ховор металлын зах зээл ойролцоогоор 40 их наяд воноор хэмжигдэж байгаа ч энэ нь зөвхөн импортоос бүрддэг. Өөрөөр хэлбэл энэ чиглэлийн бүтээгдэхүүнээр 100 хувь импортын хамааралтай. Тиймээс Монгол Улс БНСУ-д газрын ховор металл нийлүүлснээр эдийн засгаа хөгжүүлнэ, мөн манай улсын хувьд илүү найдвартай, тогтвортой ханган нийлүүлэгчтэй болно. Ингэснээр хоёр улс нэг нэгэндээ тохирсон, харилцан ашигтай түншүүд болж чадна гэсэн хүлээлттэй байна"

Нийтэлсэн огноо2023-11-26