Монгол Улс 2025 оны Global Peace Index (GPI) буюу Дэлхийн энх тайвны индексийн тайланд Ази тивийн хамгийн тайван, аюулгүй орнуудын эхний тавд багтжээ.

Уг индексийг Австралид төвтэй “Institute for Economics and Peace” (IEP) байгууллага жил бүр гаргадаг бөгөөд дэлхийн 160 гаруй орныг нийгмийн аюулгүй байдал, дотоод болон гадаад мөргөлдөөний түвшин, цэрэгжилтийн үзүүлэлт зэрэг 20 гаруй шалгуураар үнэлдэг ажээ. Дэлхийн энх тайвны индекс нь улс орнуудыг 1-5 оноогоор үнэлдэг бөгөөд бага оноо нь энх тайвны түвшин өндөр байгааг харуулж байна.

Индекс нь нийгмийн аюулгүй байдал, хамгаалалт, үргэлжилж буй зөрчилдөөн, цэрэгжилт зэрэг гурван үндсэн чиглэлээр 163 улсыг эрэмбэлдэг. Сүүлийн 10 жилийн хугацаанд Монголын Дэлхийн энх тайвны индексийн үзүүлэлт сайжирч, улс орныг дэлхийн шилдэг 50 орны тоонд тогтмол багтах болсон юм. Жишээлбэл, Монгол Улс 2015 онд 2.22 оноогоор дэлхийд 42 байрт жагсаж байсан бол 10 жилийн дараах үзүүлэлтээр оноо нь 1.71 болж сайжирснаар Азид тавдугаарт, 163 орноос дэлхийд 37 дугаар байрт оржээ.

Жагсаалтыг Сингапур тэргүүлж, удаах байруудад Япон, Малайз, Бутан бичигдсэн бол Монгол Улс тэдний араас жагсав.

Тайланд дурдсанаар, Монгол Улс бүс нутгийн хэмжээнд харьцангуй тогтвортой улс төрийн орчин, гадаад зөрчилдөөн багатай байдал, нийгмийн аюулгүй байдлын үзүүлэлтээрээ давуу үнэлгээ авчээ.

Нийтэлсэн огноо2026-02-23