УИХ-ын чуулганы хуралдаанаар Ж.Чинбүрэн тэргүүтэй дөрвөн гишүүний өргөн мэдүүлсэн Эрхтэн, эд, эс шилжүүлэн суулгах тухай хуулийн төслийн анхны хэлэлцүүлгийг хийж байна. Б.Баярбаатар гишүүнээр ахлуулсан ажлын хэсэг уг хуулийн төслийг анхны хэлэлцүүлэгт бэлтгэхээр бараг бүтэн жилийн турш ажиллажээ. 

УИХ-ын гишүүн Д.Энхтүвшин: -П.Батчулуун эмчийн хувьд эд эрхтэн шилжүүлэн суулгах чиглэлээр олон жил ажилласан, олон хүнд амьдрал бэлэглэсэн ачтай хүн. Би бас тэр ачийг нь хүртсэн хүний нэг. Хууль эрх зүйн орчноо сайжруулахаар идэвхтэй ажиллаж байгаад талархаж байна. Энэ хуульд эд эрхтэн, эс шилжүүлэн суулгах асуудал хариуцсан төрийн захиргааны байгууллага байгуулахаар заасан байна. Энэ нь төсвийн асуудал байгаа учраас энэ оноос шууд байгуулах боломжгүй. Энэ зохицуулалт хэзээнээс эхлэхээр төлөвлөж байгаа вэ. Олон улсад эд эрхтэн шилжүүлэн суулгах төв байгуулахад донорын олдоц, өвчлөл, эдийн засгийн хүчин чадал зэргээсээ хамаараад тодорхой тоо буюу хэдэн сая хүнд ийм хэмжээний үйл ажиллагаа явуулдаг төв байж болно гэсэн загвар байдаг уу. Манай улс энэ чиглэлээр ямар бодлого баривал зөв вэ?

Дэд ажлын хэсгийн гишүүн, гавьяат эмч П.Батчулуун: -Анх энэ хуулийг санаачилсан Ж.Чинбүрэн гишүүн агентлаг байгуулахаар төсөлдөө тусгасан байсан. Явцын дунд Үндэсний төв байх нь зүйтэй гэж шийдсэн. ДЭМБ, Дэлхийн эрхтэн шилжүүлэн суулгах нийгэмлэгээс улс орнуудад заавар өгөхдөө 3.5-5.5 сая хүн амтай улсад 1-2 эртхэн шилжүүлэх төв байх нь зүйтэй гэдэг. Харин Үндэсний төв бол улс орон бүрд бий. Дэлхийд 93 орон эрхтэн шилжүүлэн суулгах эмчилгээ хийдэг. 

Нийтэлсэн огноо2026-04-23