Аж үйлдвэрийн салбарын үйлдвэрлэл энэ оны эхний 8 сарын урьдчилсан гүйцэтгэлээр 49.9 их наяд төгрөг болж, өнгөрсөн оны мөн үеийнхээс 56.3 хувь буюу 18 их наяд төгрөгөөр нэмэгдлээ.

Үүнд уул уурхай, олборлох аж үйлдвэрийн салбар 68.2 хувь буюу 17 их наяд, боловсруулах салбар 15 хувь буюу 759.3 тэрбум төгрөгөөр нэмэгдсэн нь нөлөөлснийг Үндэсний статистикийн хороо мэдээлэв.

Уул уурхай олборлох аж үйлдвэрийн салбарын үйлдвэрлэл дээрх хугацаанд 42 их наяд төгрөг болж нэмэгдэхэд металлын хүдэр олборлолтын салбар 75.8 хувь буюу 10.2 их наяд, чулуун, хүрэн нүүрс олборлолтын салбар 63.9 хувь буюу 6.4 их наяд төгрөгөөр нэмэгдсэн нь нөлөөлжээ. Уул уурхай, олборлох аж үйлдвэрийн салбарт төмрийн хүдэр, зэсийн баяжмал металл агуулгаараа, төмрийн хүдрийн баяжмал, хайлуур жонш, хайлуур жоншны баяжмал, чулуун нүүрсний биет хэмжээ өнгөрсөн оны мөн үеийнхээс 2.2-57.5 хувиар нэмэгдсэн бол хүрэн нүүрс, газрын тос, цэвэршүүлээгүй алт, цайрын баяжмал, мөнгөний баяжмал 3.4-40.4 хувиар багасжээ.

Боловсруулах аж үйлдвэрийн салбарт цэвэр спирт, гурил, металл бэлдэц, цемент, шингэн сүү, самнасан ноолуур, шохой, ноолууран сүлжмэл эдлэл зэрэг гол нэр төрлийн бүтээгдэхүүний үйлдвэрлэлийн биет хэмжээ өнгөрсөн оны мөн үеийнхээс 1.1-20.3 хувиар нэмэгдэж, харин цагаан архи, ус, ундаа жүүс, катодын зэс, малын мах, янжуур тамхи, нүүрсэн шахмал түлш зэрэг гол нэр төрлийн бүтээгдэхүүний үйлдвэрлэл 2.9-93.1 хувиар багассан байна.

Аж үйлдвэрийн салбарын борлуулсан бүтээгдэхүүн энэ оны эхний 8 сарын урьдчилсан гүйцэтгэлээр 55.7 их наяд төгрөг болж, өнгөрсөн оны мөн үеийнхээс 60.1 хувь буюу 20.9 их наяд төгрөгөөр нэмэгдэв. Үүнд уул уурхайн салбарын борлуулалт 74.8 хувь буюу 20 их наяд төгрөгөөр өссөн нь нөлөөлжээ.

Гадаад зах зээлд энэ оны эхний 8 сарын урьдчилсан гүйцэтгэлээр 43.1 их наяд төгрөгийн борлуулалт хийсний 42.2 их наяд нь уул уурхай, олборлох салбарынх аж. Уул уурхайн бүтээгдэхүүний гадаад борлуулалтын 36.5 хувийг нүүрс, 59.5 хувийг металлын хүдэр, 1.5 хувийг газрын тос олборлолтын, 2.5 хувийг бусад ашигт малтмал олборлолтын салбар эзэлж байна.

Нийтэлсэн огноо2026-09-15