Монгол Улсын 2021 оны төсвийн урсгал зардал дотоодын нийт бүтээгдэхүүний өсөлтөөс давсан нь эдийн засаг талаасаа болон үр ашиг талаасаа сөрөг үр дагавартайг Төсвийн тогтвортой байдлын зөвлөл (ТТБЗ) тайландаа онцоллоо.
Монгол Улсын дотоодын нийт бүтээгдэхүүн 2021 онд оны үнээр 15 орчим хувиар өссөн ч төсвийн алдагдал дотоодын нийт бүтээгдэхүүний 6.8 хувьтай тэнцсэн юм.

2021 онд төсвийн орлого 36.5 хувиар, зарлага 12.2 хувиар тус тус нэмэгдсэнээс зарлагын өсөлтөд урсгал зардал 17.8 хувиар өссөн нь голлон нөлөөлсөн байна.

Сүүлийн хоёр жилд төсвийн урсгал зардал төсвийн тэнцвэржүүлсэн орлогоос давсан нь COVID-19 цар тахлын сөрөг нөлөөг зөөлрүүлэх арга хэмжээтэй холбоотой байж болох ч алдагдлыг дотоодын нийт бүтээгдэхүүнтэй харьцуулбал хэт өндөр буюу үндсэн суурь хязгаар хоёр хувиас 5-10 хувь нэгжээр өндөр байна.
Мөн зардал их гаргасан нь COVID-19-оос гадна сонгуулийн нөлөө байгааг үгүйсгэхгүй болохыг Төсвийн тогтвортой байдлын зөвлөл тайландаа дурджээ. 2008 оны сонгуулиас үүдсэн иргэн бүр баялаг хүртэх эрхтэй гэсэн ойлголт хандлагын улмаас бэлэнчлэх сэтгэлгээнд дасаж, хөдөлмөр эрхлэлт хангалтгүй байгааг таслан зогсоох нь зүйтэйг тодотгосон байна. Хөдөлмөр эрхлэлтийг нэмэгдүүлэхгүйгээр төсвийг эрүүлжүүлэх боломжгүйд хүрч байна гэсэн дүгнэлтийг Төсвийн тогтвортой байдлын зөвлөлөөс гаргажээ.

Бусад улс орнуудын төсвийн гүйцэтгэлээс харахад 2021 онд COVID-19-ийн нөлөөгөөр нийгмийн зорилтот бүлэгт төсвийн хязгаарлагдмал нөөцийг зориулан хуваарилахаас өөр аргагүй байна гэх дүгнэлт хийжээ.

Нийтэлсэн огноо2022-08-07