“Asian Battery Minerals” компани “Ямбат” төслийн "Copper Ridge" талбайд 250 метрийн судалгааны зорилготой алмазан өрөмдлөг гүйцэтгэжээ

Австралийн Хөрөнгийн биржид бүртгэлтэй “Asian Battery Minerals” компани Говь-Алтай аймагт байрлах зэс, никель, цагаан алтны “Ямбат” төслийнхөө хайгуулын үр дүнгээс танилцууллаа.

Хайгуулын өрөмдлөгийн эхний үе шатны хүрээнд тус компани “Ямбат” төслийн талбайд нийт 19 цооног амжилттай өрөмдөж, зэс-никелийн сульфидын хүдэржилт илрүүлсэн байна. Энэ нь Монголын баруун өмнөд хэсэгт илэрч буй шинэ төрлийн хүдэржилт болж байгааг дурджээ.

Үүнээс гадна “Asian Battery Minerals” компани “Ямбат” төслийн "Copper Ridge" талбайд нийт 250 метрийн судалгааны зорилготой алмазан өрөмдлөг гүйцэтгэсэн байна. Энэ дундаас нэг цооногийн өрөмдлөгийн үр дүнд газрын дөт гүнээс эхлээд зэс, алтны хүдэржилт байгааг илрүүлжээ. Ингэснээр хайгуулын ажлаа цаашид илүү өргөтгөх өндөр боломжтой гэж үзсэн байна.

“Asian Battery Minerals” компани зэс, никелийн “Ямбат” төслөөс гадна бал чулууны "Хөх таг" болон литийн "Цагаан дэрс" зэрэг төслүүд дээр ажиллаж байгаа юм.