Оны эхний гурван улиралд үнэт цаасны зах зээлийн арилжааны үнийн дүн 61.7 хувиар өсжээ

2024 оны III улирлын байдлаар хөрөнгийн зах зээлийн үнэлгээ 12.1 их наяд төгрөгөөр хэмжигдэж буй нь өмнөх оны мөн үеэс 18.6 хувиар өссөн дүн боллоо. “Топ-20” индекс 35.1 хувиар буюу 12.4 мянган нэгжээр дээшилж, 47 мянга 864 нэгж хүрсэн байна.

Тайлант хугацаанд нэг их наяд гаруй төгрөгийн үнэт цаас арилжаалагдсан нь өмнөх оны мөн үеэс 61.7 хувиар эрчимжсэнийг Санхүүгийн зохицуулах хороо тайлагналаа. Нийт арилжаанд эзлэх компанийн бондын хувь хэмжээ 58.4 хувьд хүрсэн байна. Ингэснээр 2021 оны III улирлаас хойших дээд үзүүлэлт нь болов.

Нийт бондын арилжааны 80.8 хувийг 2024 оны II улиралд "Нийслэлийн Засаг даргын хөтөлбөр"-ийн хүрээнд гаргасан өрийн хэрэгсэл эзэлж байгаа аж.

Мөн “Сэндли ББСБ” ХК 10 тэрбум төгрөгийн бонд, “Ард кредит ББСБ” ХК 13.5 тэрбум төгрөгийн бонд гаргасан байна.

Харин нөгөө талд хувьцааны арилжааны идэвх бага зэрэг суларчээ. III улиралд 244.1 тэрбум төгрөгийн хувьцаа эргэлтэд орсон нь өмнөх оны мөн үеэс хоёр дахин буурсан үзүүлэлт боллоо.

Наймдугаар болон есдүгээр сард хувьцааны арилжааны идэвх суларч, жил бүрийн сүүлийн улиралд хөрөнгө оруулалт хийх, худалдан авах идэвх нэмэгдэх хандлагатай байдгийг “TDB Securities SC” ХХК-ийн дэд захирал Г.Энхбат мэдээлсэн юм.

Үүнээс гадна энэ онд Үнэт цаасны тухай хуульд нэмэлт өөрчлөлт орсонтой холбоотойгоор ирэх жилээс хадгаламжийн сертификат, үнэт цаас барьцаалах гэсэн шинэ бүтээгдэхүүн гарах хүлээлттэй байгааг Монголын Хөрөнгийн бирж онцолж байв.