Asian Battery Metals: Хайгуулын өрөмдлөгийн явцад 3.6 метрийн өндөр үнэ цэнтэй ашигт малтмалын бүс байгааг илрүүлсэн

Австралийн Хөрөнгийн биржид бүртгэлтэй “Asian Battery Metals” компани Говь-Алтай аймаг дахь никель, зэс, цагаан алтны “Ямбат” төслийнхөө талбайгаас өндөр агуулгатай сульфидаар баялаг бүс илрүүлсэн болохоо мэдээллээ. Тухайлбал: хайгуулын өрөмдлөгийн явцад 3.6 метрийн өндөр үнэ цэнтэй ашигт малтмалын бүс байгааг илрүүлсэн байна. Энэ нь тус компанийн өмнөх хайгуулын өрөмдлөгийн ажилтай адил сайн үр дүн дагуулсан гэж компани онцолж байна.

Ингэснээр Азийн цэнэг хураагуурын металлын салбарын гол ордуудын нэг болох боломж, потенциал нь тэлсээр байгааг “Asian Battery Metals” компани тодотгожээ.

Тус компани “Ямбат” төслөөс гадуур магмын гаралтай зэс, никелийн нөөц байж болзошгүйг илрүүлсэн төдийгүй төслийн хойд хэсгээс зэс-алтны эрдэсжилт илрүүлснээ наймдугаар сард мэдээлж байсан юм. Тухайлбал: 30 метрийн өргөн, 400 метрийн урт андезит чулуулгаас илрүүлсэн шинэ төрлийн эрдэсжилтээ “Copper Ridge” гэж нэрлэснээ тодотгож байв.