Монгол Улсын Төв банк болон Засгийн газар бие даасан байдлаа хадгалж, хамтран ажилласнаар инфляцыг тогтворжуулж, эдийн засгийн урт хугацааны тогтвортой байдлыг бүрдүүлж чадна гэж ОУВС мэдээллээ

Монголбанк үнийн тогтвортой байдлыг хадгалахад хоёр сорилттой тулгарч байгааг мөн тодотгов. Үүнд үйл ажиллагааны бие даасан байдал хангалтгүй болон төсвийн мөнгөний бодлогод үзүүлж буй нөлөө өндөр байна гэж ОУВС үзсэн байна.

Өөрөөр хэлбэл төсөв болон мөнгөний бодлогын уялдаа холбоог сайжруулснаар инфляцыг илүү хурдан зорилтот цэгт хүргэх боломжтой гэж үзэж байна.

Монгол Улсын Засгийн газрын эдийн засагт эзлэх хувь хэмжээ өндөр байгаатай холбоотойгоор Засгийн газрын бодлого сайжрах нь инфляцыг тогтвортой хадгалахад чухал үүрэг гүйцэтгэнэ. Үүнээс гадна Монголбанкны Засгийн газраас хараат бус байдлыг бүрдүүлэх нь чухал болохыг тодотголоо.

Мөн цикл дагасан төсвийн бодлого баримталж байгаа нь эдийн засгийн өсөлтийн тогтворгүй байдлыг бүрдүүлж, инфляц эрчимжихэд хүргэж байгааг дурдсан байна. Эдийн засгийн өсөлттэй үед зарцуулалтаа хянаж, төсвийн тогтвортой бодлогоо дагаж мөрдсөнөөр энэ хамаарлыг бууруулах боломжтой гэж зөвлөжээ.