Ураны төслийг хэрэгжүүлснээр Монголын талд тав орчим тэрбум ам.долларын ашиг, орлого авчрах бөгөөд орон нутгийн хөгжлийн санд 44 сая ам.долларыг шууд шилжүүлж, орон нутгийн иргэдэд дэмжлэг үзүүлэх, боловсрол, эрүүл мэнд, нийгмийн хөгжилд зориулагдах боломж бүрдэнэ

Монгол Улсын Засгийн газар Франц улсын “Orano Mining C.A.C” компанитай Хөрөнгө оруулалтын гэрээнд гарын үсэг зурлаа. Монголын талаас Монгол Улсын сайд, ЗГХЭГ-ын дарга Н.Учрал, Сангийн сайд Б.Жавхлан, Аж үйлдвэр, эрдэс баялгийн сайд Ц.Туваан, “Эрдэнэс Монгол” ХХК-ийн Гүйцэтгэх захирал С.Наранцогт, Францын талаас БНФУ-ын Европ, гадаад хэргийн сайдын дэргэдэх Гадаад худалдаа, хилийн чанад дахь иргэдийн асуудал эрхэлсэн сайд Лурон Сен Мартан, “Orano” группийн Гүйцэтгэх захирал Никола Маас, “Orano Mining C.A.C” компанийн Гүйцэтгэх захирал Завье Сен Мартайн Тийе, “Бадрах Энержи” компанийн ерөнхий менежер Марк Мелеард нар гэрээнд гарын үсэг зурж, баталгаажуулав.

Ерөнхий сайд Л.Оюун-Эрдэнэ “Энэхүү гэрээ нь Монгол Улс гурав дахь хөрш оронтойгоо хийж буй түүхэн ач холбогдолтой, хоёр дахь хөрөнгө оруулалтын гэрээ болох”-ыг онцоллоо. Мөн тэрбээр "Төслийн хүрээнд ногоон эрчим хүч болох цөмийн эрчим хүчний үндсэн түүхий эд 68.9 мянган тонн уран үйлдвэрлэж, уламжлалт нүүрсэнд суурилсан цахилгаан станцуудтай харьцуулахад улс орнуудын хүлэмжийн хийн ялгарлыг 3.9 тэрбум тонноор бууруулж, уур амьсгалын өөрчлөлттэй тэмцэх 2015 оны Парисын хэлэлцээрээр НҮБ, Олон Улсын Хамтын Нийгэмлэгийн өмнө хүлээсэн үүрэг, амлалтаа биелүүлэх чухал алхам хийлээ. Монгол Улс байгалийн баялгаа цэвэр эрчим хүч үйлдвэрлэхэд зориулан эдийн засгийн эргэлтэд оруулж байгаа”-г дурдав.

Харин Франц улсын Европ, гадаад хэргийн сайдын дэргэдэх Гадаад худалдаа, хилийн чанад дахь иргэдийн асуудал эрхэлсэн сайд Лурон Сен Мартан “Энэхүү төсөл Франц болон Монгол Улсын хувьд стратегийн ихээхэн ач холбогдолтой” гэдгийг тодотгосон юм.

Төслийг хэрэгжүүлснээр Монголын талд тав орчим тэрбум ам.долларын ашиг, орлого авчрах бөгөөд орон нутгийн хөгжлийн санд 44 сая ам.долларыг шууд шилжүүлж, орон нутгийн иргэдэд дэмжлэг үзүүлэх, боловсрол, эрүүл мэнд, нийгмийн хөгжилд зориулагдах боломж бүрдэх аж.

Төсөл хэрэгжих олон улсын стандартыг Казахстан улсын сайн туршлагад үндэслэн хэрэгжүүлэхээр талууд тохиролцсон бөгөөд гэрээний үүргээ биелүүлж, байгаль орчин, нөхөн сэргээлт, чанарын стандартыг нарийвчлан хангаж ажиллахыг зорьж байна.