Өнгөрсөн сард төсвийн нийт орлого 1.7 их наяд төгрөг болж, өмнөх оны мөн үеэс 38.9 хувиар буурсан нь алдагдалд нөлөөлсөн байна

Нэгдсэн төсвийн тэнцвэржүүлсэн тэнцэл нэгдүгээр сард 492.7 тэрбум төгрөгийн алдагдалтай гарсныг Үндэсний статистикийн хороо мэдээллээ.

Төсвийн тэнцвэржүүлсэн орлого тусламжийн хэмжээ 1.7 их наяд төгрөг хүрч, өмнөх оны нэгдүгээр сараас 1.1 их наяд төгрөг буюу 39 хувиар буурсан байна. Харин нийт зарлага, цэвэр зээлийн дүн 2.2 их наяд төгрөг болж, 5.2 хувиар өсжээ.

Тайлант хугацаанд татварын нийт орлого 1.5 их наяд төгрөг хүрч, өмнөх оны мөн үеэс 44 хувиар буурахад орлогын албан татварын орлого 46.6 хувиар, НӨАТ 34 хувиар, АМНАТ 86.1 хувиар тус тус буурсан нь нөлөөлсөн аж. Харин нийгмийн даатгалын болон гадаад үйл ажиллагааны орлого 7-25 хувиар өссөн үзүүлэлттэй байна.

Нэгдүгээр сард экспортын орлого 23 хувиар буурсан үзүүлэлттэй гараад байгаагаас нүүрсний экспортын үнийн дүн 449 сая ам.доллар болж, өмнөх оны мөн үеэс 44 хувиар буурчээ. 2025 онд Монгол Улс 83 сая тонн нүүрс экспортолж, нэг тонныг нь дунджаар 105 ам.доллароор худалдахаар тооцоолж, нэгдсэн төсвийн нийт орлогыг 33.8 их наяд төгрөг байхаар баталсан юм.

Өнгөрсөн сарын байдлаар БНХАУ-ын нүүрс татан авалт удаашралтай байгаа тул Монголын нүүрсний экспорт удааширч, үнэ нь бага зэрэг буурч байгааг “Эрдэнэс Монгол” нэгдэл мэдээлж байв. 2025 онд нүүрсний үнэ 2024 оноос дунджаар 10-12 хувиар буурах төлөвтэй гэж Дэлхийн банк мөн мэдээлж байлаа.

Нэгдүгээр сард төсвийн зарлага өсөхөд бараа, үйлчилгээний зардал өмнөх оны мөн үеэс 23.8 хувиар, урсгал шилжүүлэг 16.4 хувиар тус тус өссөн нь нөлөөлжээ. Харин хөрөнгийн зардал 35 хувиар буурсан байна.