Агаарын бохирдлыг бууруулах Үндэсний хорооны дэргэдэх Эрдэмтдийн зөвлөлийн өнөөдрийн хуралдаанаар хагас коксон түлшинд шилжих талаар “Тавантолгой түлш” ХХК-ийн Гүйцэтгэх захирал Ц.Эрдэнэбаяр мэдээлэл өглөө.
Тэрбээр,
"Энэ онд галлагааны улиралд хагас коксон түлшийг хэрэглэхээр эрдэмтдийн зөвлөмжийг “Тавантолгой түлш” компани хэрэгжүүлэн ажиллаж байна. Хүлээж буй үндсэн үр дүн нь түлшнээс үүдэх ялгарлыг ойролцоогоор 50 орчим хувиар бууруулах юм. Нийслэлийн агаарын чанарт 27-28 хувийн эерэг нөлөө үзүүлнэ гэсэн тооцоолол гараад байгаа.
2025 оны 12-р сарын 1-21-ны өдөр хийсэн урьдчилсан тооцооллоор 23-24 хувийн үр дүн аль хэдийнээ гарсан. Нийлүүлэлтийн хувьд өмнөх намар төлөвлөгөө тасалдах асуудал гарсан ч одоогийн байдлаар хэвийн байгаа. Гэр хорооллын иргэдэд борлуулахаар төлөвлөсөн хэмжээний түлшний нөөц хангалттай байгаа тул энэ тал дээр санаа зовох зүйлгүй.
Үйлдвэрийн аргаар бүрэн боловсруулсан түлшийг гаднаас яагаад авч байгаа юм бэ гэх асуулт олон ирдэг. Үнэндээ Монголд одоогоор нүүрсний брикет, хагас коксын бүрэн хэмжээний үйлдвэргүй. Энэ жилээс төслүүд хага кокс руу шилжиж, болит үр дүн гарч эхэлсэнтэй холбоотойгоор дотоодын үйлдвэрүүд байгуулахаар эрчимтэй ажиллаж байна. Эрдэм шинжилгээний хурлаар эрдэмтдийн зүгээс зөвлөмжүүдээ бататгасан учир ирэх онд дотоодын үйлдвэрүүдийг байгуулж, нийлүүлэлт хийж эхэлнэ” гэв.
Т.ГЭРЭЛТ-ИРЭЭДҮЙ

Нийтэлсэн огноо2025-12-22