"Agua Garden" хотхонтой холбоотой цаг үеийн асуудлаар мэдээлэл өглөө.
"Эм энд Жи Констракшн" ХХК-ийн гүйцэтгэх захирал А.Амарбаясгалан" Манай компанид олгосон газар анхнаасаа орон сууц барих зориулалттай байсан. Улсаас уг газрыг усан парк барих цорын ганц зориулалтаар олгоогүй. Харин 2016 онд бид өөрсдийн төлөвлөлтөөр, гадаадын хөрөнгө оруулалтаар 100 сая ам.долларын өртөгтэй усан парк барихаар ярьж, судалж байсан юм. Гэвч тухайн үед ковид-19 цар тахал гарснаар хөрөнгө оруулалт татах боломж бүрэн хаагдсан. Улмаар уг төсөл хэрэгжих нөхцөл бүрдээгүй. Иймд бид орон сууцны төслөө эхлүүлээд явсан. Нийгэмд тархаад байгаа “усан парк барина гэж газар авчхаад орон сууц барьсан” гэх мэдээлэл бол ташаа. Учир нь энэ газар анхнаасаа орон сууц барих зөвшөөрөлтэй байсан. Тодруулбал, Засгийн Газрын тогтоолыг үндэслээд 40 мянган айлын орон сууц хөтөлбөрийн хүрээнд орон сууц барих боломжтой гэж НИТХ-аас олгосон газар юм. Улмаар бид тухайн үеийн хууль, журмын дагуу сонгон шалгаруулалт нь орж дуудлага худалдааны анхны үнэ төлөөд барилгаа барьсан. Бүх нотлох баримтууд нь бидэнд байгаа. 
Мөн манай төслийг улс төрийн нөлөөтэй, ард нь төрийн томчууд байгаа мэтээр гүтгэсэн. Манай компанид улс төрийн эрх мэдэл бүхий нэг ч хүн байхгүй. Манай садан төрөлд сумын засаг дарга ч байхгүй. Энэ барилга 96 компанийн хөрөнгө оруулалт, захиалагч иргэдийн мөнгө, банкнаас авсан зээлээр боссон. Бид энэ төслийг хэрэгжүүлэхэд хэнд ч авлига өгөөгүй. Энэ газрыг бид хууль ёсны дагуу орон сууц барих зориулалтайгаар авсан. Хэрэв бид хууль зөрчиж, хахууль өгч энэхүү барилгыг барьсан бол усаа холоос зөөж, тогоо гурван км-ын цаанаас авахгүй байсан. Авлигатай тэмцэх газар манай төслийг дөрвөн удаа шалгасан. Гэвч өнөөдрийг хүртэл ямар нэгэн эцсийн шийдэл гаралгүй, асуудал гацсан хэвээр байна” гэлээ.

Нийтэлсэн огноо2026-01-22