Дэлхийн банк Монгол Улсын Засгийн газартай хамтран эрчим хүчний найдвартай байдлыг хангах дамжуулах шугамын төслүүдийг амжилттай хэрэгжүүлж байна.
Цаашид эдийн засгийн өсөлтийг тэтгэх гол хөшүүрэг эрчим хүчний салбарын болон нийслэлийн төвлөрлийг сааруулах дэд бүтцийн төслийг төр, хувийн хэвшлийн түншлэлээр хэрэгжүүлэх нь чухлыг Тэргүүн Шадар сайд бөгөөд Эдийн засаг, хөгжлийн сайд Ж.Энхбаяр Дэлхийн банкны Монгол дахь суурин төлөөлөгч Таехюн Лиг хүлээн авч уулзах үеэрээ тэмдэглэлээ.
Талууд Монголын дунд, урт хугацааны хөгжлийн бодлогын тэргүүлэх чиглэлүүд хүрээнд санал солилцон, салбар хоорондын уялдаа холбоог хангаж, тодорхой төслүүдэд техникийн түвшинд шуурхай хамтран ажиллахаар тохиролцсоныг ЭЗХЯ мэдээлжээ.
Уулзалтын үеэр эрчим хүч, зам тээвэр, дэд бүтэц зэрэг эдийн засгийн өсөлтийг дэмжих стратегийн салбарын шинэчлэл, хэрэгжүүлэх бодлого, хөтөлбөрийн талаар ярилцсан байна. Тэргүүн Шадар сайд Ж.Энхбаяр салбарын либералчлалыг амжилттай хэрэгжүүлэхэд хувийн хэвшлийн хөрөнгө оруулалтыг татах нь чухлыг онцолж, хөрөнгө оруулагчдын итгэлийг бэхжүүлэх, эрсдэлийг хуваалцахад Дэлхийн банкны санхүүгийн баталгаа зэрэг шинэлэг арга хэрэгслийг ашиглан хамтран ажиллах санал дэвшүүлсэн юм.  
Дэлхийн банкны Монгол дахь суурин төлөөлөгч Таехюн Ли Монгол Улсын эрчим хүч, хөдөө аж ахуй, мэдээллийн технологи, хөрөнгө оруулалтын орчныг сайжруулахад идэвхтэй хамтран ажилладгаа тодотгоод, Тэргүүн Шадар сайдын дэвшүүлсэн хамтын ажиллагааны чиглэлүүд нь хоёр талын стратегийн түншлэлд нийцэж байгааг онцлов.
Түүнчлэн ЭЗХЯ-наас Хөрөнгө оруулагчдын эрх ашгийг хамгаалах төвийг байгуулсныг үнэлж, бизнесийн орчныг сайжруулах, хөрөнгө оруулагчдад чиглэсэн бодлогыгдэмжихээ илэрхийллээ.
Монгол Улсын бүтээн байгуулалт, үйлдвэрлэл өргөжихийн хэрээр өсөн нэмэгдэж буй эрчим хүчний хэрэглээг хангахад анхаарч, 2026-2030 онд хэрэгжүүлэх Монгол Улсын таван жилийн үндсэн хөгжлийн төлөвлөгөөнд тусгасан ажлыг дэмжин хамтран ажиллахад бэлэн гэдгээ мэдэгджээ.

Нийтэлсэн огноо2026-02-06