Зэсийн баяжмалын экспорт I-XI сард 8.4 хувиар өсөж 1.67 тэрбум ам.доллар болов www.bloombergtv.mn
Оны эхний 11 сард Монгол Улсын нүүрсний нийт экспорт 34.9 сая тонн болсон нь 2019 оны 42 сая тонны зорилтын 83 хувьтай тэнцэж байна. Харин I-XI сард 1.29 сая тонн зэсийн баяжмалыг 1.67 тэрбум ам.доллароор экспортолсон талаар Үндэсний статистикийн хороо мэдээллээ.
Өнгөрсөн оны мөн үетэй харьцуулахад биет хэмжээгээр 1.4 хувь, мөнгөн дүнгээр 8.4 хувиар буурсан байна. Гол экспортлогч “Оюу Толгой” ХХК-ийн олборлож байгаа баяжмал дахь зэс, алтны агууламж өмнөх жилийнхтэй харьцуулахад буурсан талаар тус компани мэдээлж байв.
Үүнээс гадна оны эхний 11 сард 631 мянган тонн жоншийг 187.2 сая ам.доллароор экспортолсон талаар Үндэсний статистикийн хороо мэдээллээ. Жилийн өмнөхтэй харьцуулахад биет хэмжээгээр 28 хувиар, мөнгөн дүнгээр 13 хувиар өсжээ. Жоншны нийт экспортын 25.1 хувийг ОХУ-д, 74.7 хувийг БНХАУ-д нийлүүлж байна. Зөвхөн хагас жилийн дүнгээр авч үзвэл нийт 47 компани жонш экспортолсноос “Монгол Чех металл” ХХК хамгийн их буюу 13.6 хувь, “Бужгар орд” ХХК 10.9 хувь, “Монголросцветмет” ХХК 5.8 хувийг гаргасан талаар “Asia Mining” сэтгүүл мэдээлжээ. "Жоншны компаниудад экспортын нэгдсэн бодлого үгүйлэгдэж байгаа гэдгийг "Баялаг жонш" компани мэдээлж байлаа.
Харин олон улсад цайрын үнэ буурсантай холбоотойгоор экспортын орлого багассан байна. Оны эхний 11 сард 124.7 мянган тонн цайрыг 175.3 сая ам.доллароор экспортолсон байна. Энэ нь биет хэмжээгээр 9.5 хувиар өссөн ч мөнгөн дүнгээр 4.5 хувиар буурсан дүн юм.
Өнгөрсөн оны мөн үетэй харьцуулахад хамгийн их орлого нь нэмэгдсэн салбар бол төмрийн хүдрийн салбар байгаа аж. Оны эхний 11 сард 7.6 сая тонн төмрийн хүдрийг экспортолж, 519.2 сая ам.долларын орлого олсон байна. Энэ нь биет хэмжээгээр 12 хувиар, мөнгөн дүнгээр 69 хувиар өссөн дүн юм.
Нийтэлсэн огноо2019-12-12
