Уул уурхай, хүнд үйлдвэрийн яамны сайд Г.Ёндон Австралиас Монгол Улсад суугаа Элчин сайд Кэти Смиттэй наймдугаар сарын 5-ны өдөр уулзаж, хоёр орны геологи, уул уурхайн салбарын хамтын ажиллагааны талаар санал солилцлоо. Австрали улсын уул уурхайн салбарын арвин баялаг туршлага, тэргүүлэх техник, технологи, байгаль орчны менежмент, баялгийн сайн засаглал зэргээс туршлага судалж, нутагшуулах нь манай улсын уул уурхайн салбарт чухал ач холбогдолтой болохыг сайд Г.Ёндон энэ үеэр дурдсан. Мөн манай улсын уул уурхайн салбарын эрх зүйн орчныг боловсронгуй болгох, үндэсний гео мэдээллийн санг бүрдүүлэхэд үнэтэй хувь нэмэр оруулж байгаа Австрали-Монголын эрдэс баялгийн салбарын хөтөлбөр /АМЕП-2/-ийг Австралийн засгийн газраас дэмжин хэрэгжүүлж байгаад талархал илэрхийллээ.

Австралийн хөрөнгө оруулсан Оюу Толгой төсөл амжилттай хэрэгжиж буйгаас гадна тус улсын хөрөнгө оруулалттай 60 гаруй компани ашигт малтмалын хайгуул, олборлолт, ханган нийлүүлэлтийн чиглэлээр Монгол Улсад үйл ажиллагаа явуулж байгааг Элчин сайд Кэти Смит дурдсан юм.

Уг уулзалтын үеэр энэ оны есдүгээр сард Улаанбаатар хотноо зохион байгуулагдах “Уул уурхайн 7 хоног” арга хэмжээний талаар Австралийн сонирхогч компаниудад мэдээлэл хүргэх, тус улсын Геологийн алба болон манай улсын Үндэсний Геологийн Алба хоорондын хамтын ажиллагааг хөгжүүлэх, уул уурхайн салбарын бусад чиглэлээр талууд хамтран ажиллахаар тохиролцсон билээ. Тухайлбал, Австралийн засгийн газар өөрийн нутаг дэвсгэрийн хэмжээнд эрдэс баялгийн судалгааг орчин үеийн технологийн дэвшил ашиглан судлах, ирээдүйд үнэ цэн нь нэмэгдэх ашигт малтмалын хэтийн төлөвийг тодорхойлохоор “Exploring for the Future” нэрийн дор 225 сая ам.долларын хөтөлбөр хэрэгжүүлж байна. Уг хөтөлбөрт гадаргын геофизикийн "AusLAMP" зэрэг 2024 он хүртэл хэрэгжих чухал ашигт малтмалын олон салбар төсөл багтсан. Эдгээртэй ижил төстэй төсөл, арга хэмжээнүүдийг манай улсад хэрэгжүүлэх, энэ чиглэлийн туршлага солилцох хүсэлтийг Г.Ёндон сайд илэрхийлсэн талаар Уул уурхай, хүнд үйлдвэрийн Яамнаас мэдээллээ.

Нийтэлсэн огноо2022-08-07