Монголбанк Мөнгийн бодлогын хорооны ээлжит хурлаараа бодлогын хүүг 12 хувьд хэвээр хадгалах шийдвэр гаргалаа.

Шатахуун болон хүнсний үнийн өсөлтийн нөлөөгөөр улсын хэмжээнд инфляц эрчимжиж өнгөрсөн сард гэхэд 11.2 хувьд хүрч, зорилтоос өндөр түвшинд хүрсэн. Энэ нь нийлүүлэлтийн хүчин зүйлээс шалтгаалсан түр зуурын шинжтэй. Мах, шатахууны үнийн өсөлт аажмаар саарч дунд хугацаанд зорилтот интервалд тогтворжиж хүлээлттэй байна. Гэхдээ зуншлагын нөхцөл байдал, малын халдварт өвчин, Ойрх Дорнод, ОХУ,Украйны зөрчилдөөн зэрэг геополитикийн тодорхойгүй байдал нь нийлүүлэлтийн гаралтай инфляцад дам нөлөө үзүүлсээр байвал цаашид дарамт нэмэгдэж магадгүй.

Эдийн засгийн өсөлт оны эхний улиралд 7.9 хувьд хүрэхэд уул уурхайн салбар голлон нөлөө үзүүлсэн. Харин бусад салбарын идэвхжил сул, суурь инфляц харьцангуй бага түвшинд хадгалагдаж байна. Ирэх онуудад уул уурхайн олборлолт өсөж томоохон төслүүдийн бүтээн байгуулалт үргэлжилж эдийн засгийг тэтгэхээр байна. Мөн уул уурхайн бус салбар алгуур сэргэж, эдийн засгийн өсөлт нэмэгдэх хүлээлт бий. Эдгээрт үндэслэн бодлогын хүүг 12 хувьд хэвээр хадгалах шийдвэр гаргалаа. Энэхүү шийдвэр нь инфляцыг 2027 оноос нэмэх хасах хоёр нэгж хувийн интервалд 5 хувьд тогтворжуулах Төв банкны зорилттой нийцсэн. Дунд хугацаандаа макро эдийн засгийн тогтвортой байдлыг дэмжихэд чиглэж байна.  

Цаашид инфляцын өрнөл, нийлүүлэлтийн шинжтэй хүчин зүйлс, гадаад, дотоод эдийн засгийн төлөв хэрхэн өөрчлөгдөхөөс хамаарч Мөнгөний бодлогын хороо бодлогын хүүг нэмэгдүүлэх эсэх шийдвэрийг гаргах аж.  

Рэгзэдмаа ЭРДЭНЭЧИМЭГ

Нийтэлсэн огноо2026-06-24