УИХ-ын Халдашгүй байдлын дэд хороо 3 гишүүний бүрэн эрхийг түдгэлзүүлэх саналыг дэмжив.УИХ-ын гишүүн Т.Аюурсайхан, Д.Бат-Эрдэнэ, Н.Наранбаатар нарын бүрэн эрхийг түдгэлзүүлэхээр УИХ хаалттай хэлэлцэж байна.

УИХ-ын Ерөнхий нарийн бичгийн дарга Л.Өлзийсайхан "Монгол Улсын Их Хурлын чуулганы хуралдааны дэгийн тухай хуулийн 12.2. дахь хэсэгт Монгол Улсын Их Хурлын тухай хуулийн 22.2-т заасан асуудлыг нууцын горимоор хаалттай хуралдаанаар хэлэлцэнэ гэж, мөн Монгол Улсын Их Хурлын тухай хуулийн 22.2 дахь хэсэгт Хаалттай хэлэлцэхээр хуульд заасан болон Төрийн нууцтай холбоотой асуудлыг хаалттай хуралдаанаар хэлэлцэнэ гэж хуульчилсан. Иймд энэ асуудал нь Төрийн болон албаны нууцын тухай хуульд заасны дагуу нууцын зэрэгтэй орж ирсэн” гэж онцоллоо.

Үүнээс өмнө УИХ-ын Халдашгүй байдлын дэд хороо найман цаг гаруй хуралдаж, саналыг дэмжих шийдвэр гаргасан юм.

Эдгээр гишүүдийг шалгахад халдашгүй бүрэн эрх нь саад болж байна гэсэн шалтгаанаар бүрэн эрхийг нь түдгэлзүүлэх саналыг өмнө нь Авлигатай тэмцэх газраас Улсын ерөнхий прокурорт хүргүүлж байв.

Түүнчлэн УИХ-ын гишүүн Ж.Мөнхбатыг яллагдагчаар татан шалгаж байна. Тэрбээр өөрийн саналаар УИХ-ын гишүүнээс чөлөөлөгдөх санал өгсөн учраас бүрэн эрхээс түдгэлзүүлэх санал хүргүүлээгүй байгаа аж.

Нүүрсний хулгайтай холбоотой гэх хэрэгт нийт 85 хүнийг яллагдагчаар татсаны дунд УИХ-ын зургаан гишүүн байгааг энэ оны гуравдугаар сарын дундуур Авлигатай тэмцэх газар мэдэгдсэн юм.

Нийтэлсэн огноо2023-03-30