Монгол Улс есөн улстай Стратегийн түншлэлийн харилцаа тогтоогоод байна

Монгол Улсын Ерөнхийлөгчийн БНТУ-д хийж буй Төрийн айлчлалын хүрээнд Монгол, Туркийн иж бүрэн түншлэлийн харилцааны түвшнийг ахиулж, стратегийн түншлэлд хүргэснийг Ерөнхийлөгчийн Тамгын газар мэдээллээ. Хоёр улс 2004 оноос Иж бүрэн түншлэлийн түвшинд харилцаа, хамтын ажиллагаа өрнүүлж ирсэн юм. Ингэснээр Монгол Улс есөн улстай Стратегийн түншлэлийн харилцаа тогтоогоод байна.

Айлчлалын үеэр талууд харилцаа, хамтын ажиллагааг өргөжүүлэн хөгжүүлэх зорилгоор хоёр улс болон Засгийн газар, байгууллага хоорондын нийт 11 баримт бичигт гарын үсэг зурлаа. Тухайлбал: эрүүл мэнд, анагаахын шинжлэх ухааны салбарт хамтран ажиллах Засгийн газар хоорондын хэлэлцээр байгууллаа. Сүүлийн жилүүдэд Монгол Улсаас Турк руу эмчилгээний зорилгоор зорчих иргэдийн тоо нэмэгдсэн тул анагаахын чиглэлээр туршлага солилцох, өвчнийг оношлох, хамтарсан төсөл хөтөлбөр хэрэгжүүлэх зэргээр хамтран ажиллах юм байна.

Мөн багш, оюутан солилцох, хамтарсан төсөл, судалгаа хийх, залуучуудын биеийн тамир спорт, хөдөлмөр эрхлэлтийг дэмжих зэргээр боловсрол, соёл спортын салбарт хамтран ажиллахаар боллоо.

Байгаль орчин, ойн аж ахуй, цөлжилт, газрын доройтолтой тэмцэхэд Турк улсаас туршлага судлахаас гадна эко аялал жуулчлалыг хөгжүүлэх, байгалийн цогцолбор газруудын менежмент үйл ажиллагааг сайжруулахад хоёр улсын Засгийн газар хамтран ажиллахаар тохиролцсон байна.

Үүнээс гадна цэвэр нүүрсний технологи, уурхайн аюулгүй ажиллагааны чиглэлээр уул уурхайн салбарт Европын орнуудаас Турк улсаар дамжин Монгол руу болон эсрэг чиглэлд төмөр замын ачаа тээврийн шинэ урсгал нээх боломжийг судлах зэргээр зам тээврийн салбарт хамтран ажиллахаар Засгийн газар хоорондын хэлэлцээр байгууллаа.