Энэ онд улсын хэмжээнд 372.7 мянга га-д үр тариа, 16.0 мянган га-д төмс, 18.3 мянган га-д хүнсний ногоо, 121.9 мянган га-д малын тэжээл, 104.1 мянган га-д тосны ургамал нийт 633.4 мянган га-д  тариалалт хийхээр зориод буй.

Тавдугаар сарын 12-ны өдрийн байдлаар улсын хэмжээнд 44.6 мянган га талбайд тариалалт хийсэн байна. Үүнээс 42.1 мянган га-д үр тариа, тэр дундаа 41.3 мянган га-д улаанбуудай, 1.1 мянган га-д төмс, 833 га-д хүнсний ногоо, 460 га-д тосны ургамал тариалжээ. Ингэснээр үр тарианы тариалалт 13 хувь, төмсний тариалалт 7.2 хувь, хүнсний ногооны тариалалт 4.5 хувьтай байна.

Хаврын тариалалтыг дэмжих зорилгоор хөнгөлөлттэй зээлийн хэмжээг 70 тэрбум төгрөгөөр нэмэгдүүлж, нийт 200 тэрбум төгрөгийн эх үүсвэрийг шийдвэрлэсэн. Одоогоор 521 иргэн, аж ахуйн нэгжид 87.3 тэрбум төгрөгийн зээл олгохоор шийдвэрлэсэн бол 345 иргэн, аж ахуйн нэгжийн 68.87 тэрбум төгрөгийн зээлийн хүсэлтийг арилжааны банкууд судалж байгаа аж.

Мөн тариалан бүхий аймгуудаас авсан судалгаагаар аж ахуйн нэгж, иргэд 2025 оны ургацаас 2026 оны тариалалтад зориулан 26.7 мянган тонн үр нөөцөлсөн бөгөөд 305.1 мянган га-д уринш боловсруулан бэлтгэжээ.

Үрийн улаанбуудайн борлуулалтыг энэ оны нэгдүгээр сарын 15-наас эхлэн долоо хоног бүрийн пүрэв гарагт Хөдөө аж ахуйн биржээр нээлттэй арилжаалж буй. Одоогоор нийт 23 удаагийн дуудлага худалдаагаар 84 хувь буюу 9208 тонн үрийн улаанбуудайг арилжаалжээ.

Түүнчлэн, хаврын тариалалтад шаардлагатай төмсийг хувийн хэвшилтэй хамтран тариаланчдад хөнгөлөлттэй нөхцөлөөр нийлүүлэх ажлыг анх удаа зохион байгуулж байгаа аж. Хүнсний ногооны үйлдвэрлэлийг нэмэгдүүлэх зорилгоор гурван төрлийн хүнсний ногооны үрийг Хөдөө аж ахуйн корпораци ТӨХХК-аар дамжуулан зээлээр олгож байгааг Хүнс, хөдөө аж ахуй, хөнгөн үйлдвэрийн яам мэдээллээ.

Нийтэлсэн огноо2026-05-13