Н.Учралын Засгийн газар байгуулагдахад 2026 оны төсвийн хуульд тодотгол хийнэ гэдгийг хэлж байсан ч Ойрх дорнодын дайны нөхцөл байдал намжмал, нүүрсний экспорт хэвийн байгаа тул тодотгол хийх нөхцөл үүсээгүй гэж байсан.
Тэгвэл Засгийн газар Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт Төсвийн тогтвортой байдлын тухай хуульд өөрчлөлт оруулах тухай хуулийн төслийг өргөн мэдүүлсэн. Төсвийн тогтвортой байдлын тухай хуульд зааснаар төсөвт гурав ба түүнээс доош сард өөрчлөлт оруулахгүй гэж заасныг өөрчилөхөөр оруулж ирсэн. Учир нь Засгийн газар ирэх сард төсвийн тодотгол өргөн барьж наадмаас өмнө батлуулна гэдгийг Эдийн засаг хөгжлийн сайд Ж.Энхбаяр хэлсэн.
Тэрээр "Дэлхийн нийтэд эдийн засаг нөхцөл байдал богино хугацаанд хурдтай өөрчлөгдөж байна. Улс орнууд янз бүрийн хариу арга хэмжээ авч байна. Манайх Төсвийн хүрээний мэдэгдлээ зургадугаар сарын 1-нд батлана. Түүнээс хойш гурван сар хөдөлгөхгүй, есдүгээр сарын 1-ээс тодотгол хийх эрх үүснэ. Төсвийн тэнцлийн алдагдал, шатахууны үнийн өсөлт, валютын нөөц зэрэг асуудлууд үүснэ. Тиймээс төсвөө хурдан тодотгоод Засгийн газар хурдтай хариу арга хэмжээ авъя гэж байгаа юм. УИХ зургадугаар сарын 1-нд Төсвийн хүрээний мэдэгдлээ баталлаа, Засгийн газар тодотголоо өргөн барина. Тэгвэл наадмаас өмнө төсвийн тодотголоо хийнэ. Тэгэхгүй бол 2025 оны төсөв 2026 ондоо үргэлжлээд 2027 ондоо давж үргэлжлэхээр байна. 2025 онд 2026 оноосоо нэг их наядыг авч давсан" гэсэн юм.
Тиймээс өнөөдөр маргаашдаа төсөвт тодотгол хийх хуулийн шаардлага үүсээгүй ч ирэх сард шатахууны хил үнээс шалтгаалж төсвийг тодотгоно гэдгийг салбарын сайд хэлсэн юм. Ингэхдээ манай төсвийн урсгал зардлаас танах орон зай байхгүй гэдгийг Сангийн сайд З.Мэндсайхан хэлсэн. Харин хөрөнгө оруулалтын зардлаас танах бөгөөд ирэх онд нэг ч төгрөгийн шинэ хөрөнгө оруулалт хийгдэхгүй аж.

Нийтэлсэн огноо2026-05-13