“Говь” ХК зургаа дахь жилдээ ногдол ашиг хуваарилахгүй байхаар шийдвэрлэлээ

“Говь” ХК-ийн борлуулалтын орлого 2024 онд өмнөх онтой харьцуулахад 3.5 хувиар буурсныг тайлагнав. Аудитлагдаагүй тайлангаар тус компани өнгөрсөн онд 3.65 тэрбум төгрөгийн цэвэр алдагдал хүлээжээ. Ийнхүү тус компани тав дахь жилдээ дараалан ашиггүй ажиллаж байна. Хэдий тийм боловч цэвэр алдагдлын хэмжээ нь өмнөх оноосоо 1.8 дахин буурчээ.

Тайлант хугацаанд “Говь” компанийн борлуулалтын орлого буурч, 247 тэрбум төгрөг болсон бол борлуулалтын өртөг нь 5.7 хувиар өсөж, нийт ашгийн хэмжээ нь 15 орчим хувиар буурсан байна.

2024 оны III улирлын үйл ажиллагааны тайландаа борлуулалтын өсөлтөөс илүү ашигт ажиллагааг сайжруулахад анхаарч байгаагаа мэдээлж байсан юм. Тус компанийн борлуулалтын 68 хувийг дотоодын, үлдэх хувийг экспорт болон гадаад зах зээл бүрдүүлж байна.

“Говь” ХК зургаа дахь жилдээ ногдол ашиг хуваарилахгүй байхаар шийдвэрлээд байгаа аж. Ерөнхийдөө 2019 оноос хойш ногдол ашиг тараагаагүй юм. 2024 оны санхүүгийн үр дүнгээр ногдол ашиг олгох нөхцөлийг хангаагаагүй буюу санхүүгийн зохистой харьцааг хангахгүй байгаа гэж тус компанийн Төлөөлөн Удирдах Зөвлөл шийдвэрлэжээ.

Өнгөрсөн онд нэгж хувьцааны ханш нь 5.7 хувиар унаж, Топ-20 индекстэй харьцуулахад тааруу үр дүнтэй байсан аж.

Үүнээс гадна 2024 оны гуравдугаар сараас хойш “Таван Богд Холдингс” компани “Говь” ХК-ийн хяналтын багцыг эзэмшиж эхэлжээ. Үүний дараа “Таван Богд Холдингс” ХХК “Говь” компанийн үлдсэн хувьцааг худалдан авах санал тавьсан хэдий ч одоогийн байдлаар жижиглэнгийн хөрөнгө оруулагчид “Говь” ХК-ийн 12.67 хувийг эзэмшсэн хэвээр байна.

Хувьцааны эргэлтийн хувьд өнгөрсөн онд тус компанийн 282 сая ширхэг хувьцаа 72 тэрбум төгрөгөөр арилжаалагдсан бөгөөд хоёрдогч зах зээлийн арилжаанд идэвхээрээ тэргүүлснийг Монголын Хөрөнгийн бирж мэдээлж байсан юм.

Пүрэв гарагийн арилжаа хаахад “Говь” ХК-ийн хувьцааны ханш 0.08 хувиар өсөж, 251 төгрөг хүрлээ. Хувьцааны ханшаар илэрхийлэгдэх зах зээлийн үнэлгээ нь 195.8 тэрбум төгрөгөөр хэмжигдэж байна.