"Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай Засгийн газар хоорондын хэлэлцээр"-т гарын үсэг зурсан нь хоёр талын хамтын ажиллагааг шинэ шатанд гаргахад чухал ач холбогдолтойг хоёр улсын Засгийн газрын тэргүүн нар онцоллоо

Монгол Улсын Ерөнхий сайд Л.Оюун-Эрдэнэ БНХАУ-ын Төрийн зөвлөлийн Ерөнхий сайд Ли Чянтай Харбин хотноо уулзаж, Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх Засгийн газар хоорондын хэлэлцээрт гарын үсэг зурлаа.

Хэлэлцээр байгуулагдсанаар Монгол Улс, БНХАУ-ын хооронд Шивээхүрэн-Сэхээ, Бичигт-Зүүнхатавч, Ханги-Мандалын боомтууд төмөр замаар үе шаттай холбогдох нөхцөл бүрдэж байна.

Замын-Үүд-Эрээний төмөр замаас хойших Монгол Улс, БНХАУ-ын анхны хил дамнасан төмөр зам болж буй энэхүү төмөр зам ашиглалтад орсноор нүүрсний экспорт жилд дунджаар 83 сая тонн байгаагаас 165 сая тонн хүрч, нүүрс борлуулалтын орлого жилд 1.5 тэрбум ам.доллароор нэмэгдэнэ гэж тооцоолж байгаа юм.

Түүнчлэн “Төмөр зам холбогдсоноор экспортын орлого нэмэгдэж, нэг хүнд ногдох дотоодын нийт бүтээгдэхүүний хэмжээ 10 мянган ам.доллар хүрэх зорилт биелнэ. Монгол Улсын нийт хүн амын орлогын албан татварын дүнгээс хоёр дахин их хэмжээний нэмэлт орлого олно. Ингэснээр Үндэсний баялгийн сангийн Хуримтлалын сангийн орлого нэмэгдэж, олон жил яригдсан татварын реформыг хэрэгжүүлэх суурь нөхцөл бүрдэнэ” гэж Ерөнхий сайд онцоллоо.

Энэхүү төсөл 2004 оноос эхлэн яригдсан бөгөөд 2008 оноос хойш 17 жилийн хугацаанд нийт 60 гаруй удаагийн яриа хэлэлцээ хийгдсэн юм.

Гашуунсухайт-Ганцмод боомтын хил дамнасан төмөр замыг хамтран барих ТЭЗҮ-д тусгаснаар хил дамнасан төмөр зам өргөн царигаар жилд 30 сая тонн, нарийн царигаар 10 сая тонн ачаа тээвэрлэх боломжтой байх бөгөөд төсөл хэрэгжсэнээр Монголын нүүрсний экспорт жилд 30-50 сая тонноор нэмэгдэж, тээврийн зардал хоёр дахин буурах зэрэг эдийн засгийн өндөр ач холбогдолтойг салбарын яам онцолж байв.