ЭХЗХ-ны тооцооллоор V сарын 16-наас ус халаах төлбөр, IX сарын 1-нээс дулааны төлбөрийн тарифыг нэмэгдүүлэхээр төлөвлөжээ
Дулааны үнийг нэмэхгүй бол 118 тэрбум төгрөгийн алдагдалд орох тооцоолол гарсныг Эрчим хүчний зохицуулах хороо мэдээллээ.
Өнгөрсөн долоо хоногийн Засгийн газрын ээлжит хуралдаанаар дулааны үнэ нэмэх шийдвэрийг хойшлуулах арга хэмжээ авахаар болсныг мэдээлсэн юм.
Хэдий тийм боловч ЭХЗХ-д Засгийн газраас хараахан тогтоол шийдвэр ирээгүй, албан ёсоор ирсний дараа тодорхой саналуудыг боловсруулж танилцуулна гэдгээ мэдэгдээд байна.
ЭХЗХ-ны тооцооллоор тавдугаар сарын 16-наас ус халаах төлбөр, есдүгээр сарын нэгнээс дулааны төлбөрийн тарифыг нэмэгдүүлэхээр төлөвлөсөн аж. Аж ахуйн нэгжүүдийн дулааны төлбөр 75 хувиар нэмэгдэхээр байгаа юм. Айл, өрхийн дулааны төлбөр хоёр дахин буюу сарын төлөлт 42 мянга байсан бол үнэ нэмэгдсэний дараа 84 мянга болох тооцоолол гарчээ.
ЭХЗХ-ны мэдээлснээр дулааны эрчим хүчний тариф бодит өртгөөсөө 85 хувиар доогуур байгаа аж. Дулааны цахилгаан станцуудын худалдан авах нүүрсний үнэ, эрчим хүч үйлдвэрлэх зардал зэрэг бүх өртгийг тооцоолж үзэхэд эрчим хүч болон дулааны тарифын өөрчлөлтийн үр дүнд 2027 он гэхэд салбарын богино хугацаат өр төлбөр төлөгдөж дуусна гэж тооцоолсон байна.

Нийтэлсэн огноо2025-03-18