Мөнгөний нийлүүлэлт хоёрдугаар сард өмнөх оны мөн үеэс 11.2 хувиар өсөж, 41.8 их наяд төгрөг боллоо
Энэ онд төсөв болон төлбөрийн тэнцлийн алдагдал нэмэгдэж, улмаар мөнгөний нийлүүлэлтийн өсөлт саарах хүлээлттэй байгааг Монголбанк онцоллоо. Хоёрдугаар сарын статистик мэдээллээр мөнгөний нийлүүлэлтийн жилийн өсөлт үргэлжлэн саарч 11.2 хувьтай гарсныг Үндэсний статистикийн хороо мэдээлсэн юм. Нүүрсний экспортын орлого буурч, төлбөрийн тэнцлийн алдагдал нэмэгдсэнтэй холбоотойгоор гадаад цэвэр активын өсөлт саарч байгаа нь үүнд голлон нөлөөлсөн байна.
Мөнгөний нийлүүлэлтийг активын бүтэц талаас нь авч үзвэл 13.2 хувийг гадаад цэвэр актив, 86.8 хувийг дотоод цэвэр актив бүрдүүлжээ. Өнгөрсөн оны 11 дүгээр сараас хойш гадаад цэвэр активын өсөлт саарч, 2025 оны хоёрдугаар сарын эцсийн байдлаар 15.2 хувиар буурсныг Үндэсний статистикийн хороо мэдээллээ. Харин дотоод цэвэр актив 36.3 их наяд төгрөг болж, 2.8 хувиар өсжээ. Үүнийг зээлийн өсөлт бүрдүүлж буйг Монголбанк тодотгосон юм.
Хоёрдугаар сарын эцсийн байдлаар зээлийн жилийн өсөлт 37.8 хувь буюу өмнөх сараас дахин давсан бөгөөд хөнгөлөлттэй зээлийн нөлөөгөөр бизнесийн зээлийн өсөлт эрчимжих хүлээлттэй байна. Хэдий тийм боловч 2025 онд өмнөх онуудад тэлсэн төсвийн зарлагын өсөлтийн улмаас инфляц өндөр түвшинд хадгалагдаж байгаа тул бодлогын хүүг хоёр нэгж хувиар нэмэгдүүлсэн. Мөн гадаад зах зээлийн тодорхойгүй нөхцөл байдлууд эдийн засгийн үндсэн эрсдэл хэвээр байна гэж Монголын банкны холбоо мэдэгдлээ.

Нийтэлсэн огноо2025-03-19