Өнгөрсөн даваа гарагт буюу энэ сарын 2-нд “Дулааны цахилгаан станц-3” ТӨХК-д гал гарч нэг инженер нь амиа алдаж, нэг ажилтан нь угаартсан харамсалтай осол гарсан.
Тодруулбал, Зургаадугаар сарын 1-нээс 2-нд шилжих шөнө станц тоног төхөөрөмжөө унтраах үед осол гарсан бөгөөд, галын улмаас “ТЭЦ-3" ТӨХК-ийн хамгийн сүүлд авсан шинэ турбин шатсан. Одоогоор тус станцын үйл ажиллагаа тэг зогсож, ажилтнууд нь дотоод цэвэрлэгээ хийж байгаа талаар бид өмнө нь сурвалжилсан. Өмнөх мэдээллийг ЭНД дарж харна уу.
Мөн ослын шалтгаан болон хохирлын хэмжээг тогтоох баг ажиллаж станцад ажиллаж буй.
Үүнээс гадна ослын дараа хэн хариуцлага хүлээх вэ гэх асуудал яригдаж, Эрчим хүчний яам, Эрчист монгол ХХК, ЗГХЭГ-ын дарга Н.Учрал нар бурууг нэгэндээ нялзааж эхэлсэн.
Тиймд маргаан дагуулсан уг асуудал дээр УИХ-аас ажлын хэсэг байгуулсан юм. Ажлын хэсэг өнгөрсөн өдрүүдэд “ДЦС-3” ТӨХК-д ажиллаж ослын талаарх тайлангаа тавьжээ.
Тэд зардлын хэмнэлт нэрийн дор төсвөө танаж байсан нь осол болох бас нэг шалтгаан тул Эрчим хүчний яамтай холбоотой хариуцлагын асуудал яригдах ёстой. Мөн ослын талаарх мэдээллийг нуун дарагдуулах, хариуцлагаас зугтах, эсвэл хэн нэгэн рүү нялзаах үйлдэл хэрхэвч байж болохгүй. Ослын шалгалт, нөхөн сэргээх асуудалд бүх түвшний удирдлага хариуцлага хүлээх механизмыг бий болгох ёстой гэж дүгнэсэн байна.
Мөн дараах арга хэмжээнүүдийг авах шаардлагатай гэж үзжээ.
Үүнд:
Сэргээн засварлах ажилд шаардагдах тоног төхөөрөмжийн жагсаалтыг шуурхай гаргаж, үндэсний аюулгүй байдлын зохицуулалтаар тендерийг саадгүй явуулах эрх зүйн зохицуулалт бий болгох,
Осолд өртөж амь насаа алдсан инженер ажилтны ар гэрт эмгэнэл илэрхийлж, хүний амь нас, хөдөлмөрийн нөхцөлийг эрхэмлэн, сэргээн босголт, нөхөн төлбөр, дотоод хяналтын бодлогыг шинэчлэх,
Хөдөлмөрийн аюулгүй байдлын асуудлыг хүний эрх, сэтгэлзүйн хамгаалалттай уялдуулан авч үзэх хэрэгтэйг онцолж, тендерийн үнэлгээний шалгуурт хамгийн бага үнэ бус, чанар, стандарт, ажилчдын оролцоог тусгах шаардлагатай хэмээгээд, улс төрийн нөлөөлөл, ТУЗ-ийн бүрдэл, хуульд өөрчлөлт оруулах зэрэг арга хэмжээг багтаж байна.
Д.ЦЭГЦ

Нийтэлсэн огноо2025-06-11