Засгийн газар ирэх онд орон сууцны санхүүжилтийн дагнасан банк байгуулж, зээлийн хүртээмжийг сайжруулах замаар үл хөдлөх салбарын үйлдвэрлэл, ажил эрхлэлтийг дэмжих бодлого баримтлахаар төлөвлөөд байна.
Ерөнхий сайд Г.Занданшатар Засгийн газрын тэргүүнээр томилогдсон даруйдаа хүн амын орон сууцны хэрэгцээг хангахад бие даасан орон сууцны санхүүжилтийн дагнасан банк байгуулж ажиллах бодол бий. Судалгааг хийлгүүлнэ гэж мэдэгдэж байсан билээ. Энэ дагуу Засгийн газар өнгөрсөн сарын сүүлээр энэ асуудлыг судлах ажлын хэсгийг байгуулсан.
Ардчилсан нам Засгийн эрхийг барьж байхдаа 2013 ипотекийн хөтөлбөр санаачлан хэрэгжүүлснээр өнгөрсөн хугацаанд 130 мянга гаруй иргэн жилийн наймаас зургаан хувийн зээл авч, орон сууцтай болсон. Гэсэн ч байртай болох гэсэн иргэдийн эрэлт хангагдахгүй байгаа бөгөөд МАН 2016 оны сонгуульд ялалт байгуулсан үеэс зорилтот бүлгийнхийг хамруулах амлалт өгсөн ч өнөөдрийг хүртэл хэрэгжүүлж чадаагүй.
Харин ирэх онд  дагнасан банк байгуулах хүрээнд урт хугацааны тогтвортой эх үүсвэр бүрдүүлэх арга хэмжээг авч хэрэгжүүлэх юм байна.
Ипотекийн зээлийг санхүүжүүлэх хүрээнд 9.2 их наяд төгрөгийн санхүүжилтийг гаргасан байдаг юм. Өнгөрсөн жил анх удаа ипотекийн зээлийг дэмжих зорилгоор Засгийн газраас Хуримтлалын сангаар дамжуулан 500 тэрбум төгрөгийн санхүүжилт хийсэн. Ингэснээр ипотекийн зээлийн санхүүжилт 1.2 их наяд төгрөгт хүрсэн. Өмнө нь орон нутгийн иргэд энэхүү бага хүүтэй ипотекийн зээлд хамрагдаж чаддаггүй байсан бол санхүүжилтийн хэмжээ нэмэгдсэнээр нийт санхүүжилтийн 40 орчим хувь нь Улаанбаатар хотоос зайдуу оршиж байгаа иргэдэд хүрсэн юм. Гэхдээ нийслэдд хуваарилагдаж байсан санхүүжилтийн хэмжээ буурсан нь бас нэгэн асуудал болж хувираад буй.
Иймээс шинэ Засгийн газар орон сууцны санхүүжилтийн дагнасан банк байгуулж ажилласнаар зорилтот бүлгийнхнийг түлхүү орон сууцанд хамруулах бодлого барьж байна.

Нийтэлсэн огноо2025-08-18