Монгол Улсад 2025 оны эхний долоон сарын хугацаанд 457.2 мянган жуулчин ирсэн талаар Үндэсний статистикийн хорооноос мэдээлжээ. Энэ нь өмнөх оны мөн үеэс 21.5 хувиар өссөн үзүүлэлт юм. Энэ оны эхний долдугаар сард ирсэн жуулчдын хамгийн их буюу 120.9 мянган жуулчин БНХАУ-аас ирсэн байна. Харин энэ оны наймдугаар сард гадаад жуулчдын тоо 478.504 болж өссөн бөгөөд БНХАУ, ОХУ, БНСУ-ын жуулчин хамгийн их иржээ. Тодруулбал, 2025 оны наймдугаар сард гэхэд Өмнөд Солонгос улсаас 21.469, ОХУ-аас 20.153, БНХАУ-аас 13.828 жуулчин иржээ.
Аялал жуулчлалын мэргэжлийн холбооны гүйцэтгэх захирал М.Нарангэрэлтэй өмнө нь ярилцлага өгөхдөө "Өмнө нь бид долоо хоногт 12 нислэг авдаг байсан бол 2024 оноос эхлэн өдөрт 12-15 нислэг хүлээн авдаг болсон. Энэ бол гадаад жуулчдын тоог нотолж байгаа нэг үзүүлэлт.
Жишээлбэл, нэг өдөрт 1000 гаруй жуулчин Өмнөд Солонгос улсаас ирж байна.
Монгол Улс нь ОХУ болон БНХАУ-тай хиллэдэг учраас авто замын боомтоор жуулчид бас орж ирдэг бол БНСУ-ын жуулчид зөвхөн "Чингис хаан" олон улсын нисэх онгоцны буудлын хилийн бүсээр орж ирдэг. Ойролцоогоор таван онгоц дүүрэн Өмнөд Солонгосын жуулчин Монголыг зорин ирж байна. Үүний дараагаар БНХАУ, ОХУ орж байга бол дараагаар нь Япон, АНУ, Герман, Франц, Австрали, Их Британи, Беларусь, Турк улсын жуулчид олноор ирэх хандлагатай байна. Энэ оны бүтцийг харахад, Монгол Улс зөвхөн Азийн орны жуулчин гэлтгүй Европын орнуудад маркетингийн үйл ажиллагаагаа жигд, идэвхтэй явуулсны үр дүн юм" гэдгийг онцолж байв.

Нийтэлсэн огноо2025-08-20