АН-ын шинэ даргыг сонгох Дотоод сонгуулийн хороог өчигдөр ҮБХ-ны хуралдаанаар байгуулсан.
Тус хорооны даргаар УИХ-ын гишүүн С.Эрдэнэболд сонгогдсон байна.
Тэрбээр сонгуулийн явцын талаар сэтгүүлчдэд мэдээлэл өглөө.
С.Эрдэнэболд "Нэр дэвшигчдийг 18.00 цаг хүртэл бүртгэнэ. Шаардлага хангасан хүнд нэр дэвшигчийн мандатыг өгнө. 31-нд ҮБХ үргэлжлүүлэн хуралдаж, сонгууль явуулахаар тогтсон.
Дотоод сонгуулийн хороо нэр бүхий 15 хүний бүрэлдэхүүнтэй ба нууц санал хураалтаар дарга, нарийн бичгээ сонгосон. О.Баасанхүү нарийн бичиг, миний бие дарга нь.
Бидэнд гашуун туршлага байгаа учир бүгдийг баримтжуулж байгаа. Улс төрийн намын тухай хууль болон УДШ-д бүртгэгдсэн намын дүрмийг үндсэн эх болгож баримтална. Мөн намын даргыг сонгох 2023.01.13-ны өдрийг журмыг баримталж байгаа. Эдгээрийг хангасан ямар ч нэр дэвшигч АН-ын даргад нэр дэвших бүрэн боломжтой.
ҮБХ дээр нэр дэвшигчид мөрийн хөтөлбөрөө танилцуулж, өрсөлдөнө. Ялалт байгуулсан нэр дэвшигчийг Их хурлаар батламжилна.
Олон нэр дэвшигч гарсан тохиолдолд магадгүй хоёр, гуравдугаар шатны сонгууль явуулж болох дүрэм бий.
60 минутын хугацаанд бүрдүүлсэн материалыг хянан шалгаж, 19.00 цагт мэдээлнэ. Тухайн хүний дэвшүүлж байгаа мөрийн хөтөлбөр нь АН-ын Үндсэн дүрэм болон үзэл баримтлалд нийцэж байгаа эсэхэд ч дүгнэлт гаргах юм" гэлээ.
Г.САНСАРМАА

Нийтэлсэн огноо2025-08-29