Засгийн газраас Монголбанктай хамтран орон сууцны урт хугацаат, бага хүүтэй зээлийн хөтөлбөр хэрэгжүүлэх хүрээнд ипотекээр дамжуулж 9.9 их наядын хөнгөлөлттэй зээлийг 137 мянган иргэнд олгожээ. Ипотекийн зээлийн хүү жилийнх нь 6-8 хувьтай байгаа юм. Гэвч санхүүжилтийн эх үүсвэр хангалтгүйн зэрэгцээ зорилтотбүлгийнхнийг буюу бага, дунд орлоготой иргэдийг орон сууцжуулах зорилгодоо хүрээгүй.
Иймээс Г.Занданшатарын танхим 2026 онд багтаан Орон сууцны санхүүжилтийн банкийг төр, хувийн хэвшил болон олон улсын санхүүгийн байгууллагын хамтын оролцооны хүрээнд засаглалын оновчтой бүтэцтэйгээр байгуулах зорилт тавиад байна. Энэ хүрээнд хууль, эрх зүйн орчныг шинээр бүрдүүлэх.
Олон улсын туршлагыг судлан банкны сайн засаглалыг бүрдүүлж төрийн хувь оролцоог олон улсын байгууллага болон хувийн хэвшлийн хөрөнгө оруулагчдад үе шаттайгаар санал болгох. Санхүүжилтийн эх үүсвэрийг нэмэгдүүлэх зорилгоор Үндэсний баялгийн сангийн хөрөнгийн удирдлагын бодлоготой уялдсан арга хэмжээг хэрэгжүүлэх.
Дотоод болон гадаадын хөрөнгийн зах зээлд үнэт цаас гаргах замаар нэмэлт эх үүсвэр төвлөрүүлэх. Улаанбаатар хотын хөгжлийн төлөвлөгөөтэй нийцүүлэн, төрөөс авч хэрэгжүүлж буй гэр хорооллын дахин төлөвлөлт, агаар орчны бохирдлыг бууруулах бодлогуудтай уялдуулж орон сууцны эрэлт, нийлүүлэлтийг зохистой түвшинд ханган хэрэгжүүлэх зорилт тавиад байна.
Улаанбаатар хотын нийт өрхийн 50-иас дээш хувь, аймгийн төвүүдэд амьдарч буй өрхүүдийн 70 орчим хувь нь орчин үеийн инженерийн дэд бүтэц, шугам сүлжээнд холбогдоогүй гэр, байшин хороололд амьдарч байгаа аж. Тиймээс орон сууцны урт хугацааны тогтвортой санхүүжилтийн тогтолцоог бий болгох шаардлага тулгарч буй юм байна.
Г.ХОРОЛ

Нийтэлсэн огноо2025-09-04