Энэтхэг улс ган үйлдвэрлэлийн гол түүхий эд болох коксжих нүүрсний нийлүүлэлтээ төрөлжүүлэх зорилгоор тээврийн хүндрэлтэй нөхцөл байдалтай боловч Монгол Улсаас нүүрс импортлох боломжийг судалж байгаа талаар асуудалд ойр эх сурвалж Ройтерс ангентагт мэдээллээ.
Дэлхийн хоёр дахь том түүхий ган үйлдвэрлэгч Энэтхэг улс коксжих нүүрснийхээ хэрэгцээний 85 орчмыг импортоор хангадаг бөгөөд түүний талаас илүү хувийг Австралиас авдаг. Хоёрдогч эх сурвалжийн мэдээлснээр, ирэх жилүүдэд эрэлт өсөх төлөвтэй байгаа тул Засгийн газар болон ган үйлдвэрлэгчид шинэ нийлүүлэгчидтэй хамтрах боломжийг эрэлхийлж эхэлжээ.
Далайд гарцгүй Монгол Улс хоёр үндсэн экспортын коридортой. Урт маршрутаар ОХУ-аар дамжих зам, эсвэл Хятад руу гарах чиглэл. Монголын нүүрсний хувьд БНХАУ стратегийн ач холбогдол өндөртэй нийлүүлэгч учир Бээжин урт хугацаанд тус коридороор нэвтрэх боломжийг Энэтхэгт олгохгүй байх эрсдэлтэй гэж эх сурвалж онцолжээ. 2020 онд хил дээр гарсан мөргөлдөөний дараа хоёр улс удаан үргэлжилсэн цэргийн түгшүүрийн дараа эдийн засгийн харилцаагаа болгоомжтой сэргээж буй.
Салбарын төлөөлөл Монголын коксжих нүүрсийг харьцангуй хямд үнэтэй, өндөр чанарын нүүрсний нэг эх үүсвэр байж магадгүй гэж үздэг. Гэхдээ хамгийн том бэрхшээл логистик хэвээр байна гэж эх сурвалж хэлжээ.
Энэтхэг улс энэ онд авах ёстой байсан туршилтын нүүрсээ хараахан хүлээж аваагүй байгаа юм. Төрийн өмчит Steel Authority of India (SAIL) компани Монголоос 1 тонн нүүрс авах хүсэлт гаргасан талаар Ройтерс тавдугаар сард мэдээлж байв.
“SAIL нь Монголын коксжих нүүрсний нийлүүлэгчидтэй техникийн болон логистикийн боломжийг тодорхойлох талаар тасралтгүй харилцаж байна” гэж тус компани цахим шуудангаар мэдэгджээ.
Нөгөө талаар, Энэтхэгийн коксжих нүүрсний импортыг Орос болон АНУ тус бүр ойролцоогоор 15 хувиар бүрдүүлдэг гэж эх сурвалж нэмж хэлсэн байна.
BY
Х.Бямбажаргал нь МУИС-ийг Олон улсын харилцаа мэргэжлээр төгссөн бөгөөд 2024 оноос iToim.mn сайтад сэтгүүлч, орчуулагчаар ажиллаж байна.

Нийтэлсэн огноо2025-12-01