УИХ, ОХУ-ын Холбооны Хурал хоорондын хамтын ажиллагааны хамтарсан комиссын II хуралдаанаар Багахангай-Хөшигийн хөндий чиглэлийн тойрог төмөр замын төслийг хамтран хэрэгжүүлэх хүсэлтээ уламжилж, Монголын тал ажлын хэсэг байгуулсныг Зам тээврийн сайд Б.Дэлгэрсайхан онцоллоо.

Энэ төсөл нь Улаанбаатар хотын төвөөр дамжин тээвэрлэж буй аюултай ачаанаас үүдэх эрсдэлийг багасгах зорилготой. Түүнчлэн “Эрээнцав-Чойбалсан-Бичигт” чиглэлийн зүүн коридорын төмөр замын төслийг хэрэгжүүлэхэд хууль тогтоох дээд байгууллагын түвшинд дэмжлэг үзүүлэх шаардлагатай хэмээн тэмдэглэснийг ЗТЯ мэдээлжээ. 

Сайд Б.Дэлгэрсайхан хамтын ажиллагааны талаар байр сууриа илэрхийлэхдээ, “Улаанбаатар төмөр зам” ХНН нь Монгол, Оросын хамтын ажиллагааны бэлгэ тэмдэг, стратегийн ач холбогдолтой чухал байгууллага хэвээр байгааг тодотгож, шинэчлэл, их засвар, хөдлөх бүрэлдэхүүний парк шинэчлэлд анхаарах, урт хугацаатай, хямд эх үүсвэртэй санхүүжилтийг хамтран шийдэх боломжийг судлах нь чухлыг тодотгоод, "Монгол-Орос-Хятад улсын эдийн засгийн коридорын хүрээнд хэрэгжих төмөр замын төв коридорын Монголын хэсгийн ТЭЗҮ бэлэн болсон. Гурван талын нэгдсэн ТЭЗҮ ойрын хугацаанд дуусах төлөвтэй байгаа”-г тэмдэглэв.

Агаарын тээврийн салбарт манай хоёр улс Улаанбаатар-Москва чиглэлийн нислэгийг дэмжихээр Красноярск хотоор дамжин нислэг үйлдэх тохиролцоонд хүрч, “Аэромонголиа” ХХК-ийг энэ чиглэлд хуваарьт нислэг үйлдэх тээвэрлэгчээр томилсон. Красноярск хотод арилжааны буулт хийхтэй холбоотой гаалийн асуудлыг шийдэхэд Оросын Холбооны Хурлын дэмжлэг чухал байгааг Зам, тээврийн сайд онцолсон байна. 

Талууд хамтарсан комиссын хүрээнд бодит үр дүнд чиглэсэн хамтын ажиллагааг үргэлжлүүлэхэд санал нэгджээ. 

Нийтэлсэн огноо2026-02-11