Монголбанкнаас Мөнгөний бодлогын хорооны ээлжит хуралдааны шийдвэрийг танилцуулах үеэр сэтгүүлчид хэрэглээний болон бизнесийн зээлийг хумиж буй шалтгаан, үүнээс үүсэх эрсдэлийн талаар тодруулав. Энэхүү асуултад Монголбанкны дэд ерөнхийлөгч Г.Энхтайван дараах хариултыг өглөө.
Тэрээр “Төв банк бизнесийн зээлийн өсөлтийг хэвийн түвшинд байна гэж үзэж байна. Энэ оны нэгдүгээр сард өр орлогын харьцааг хэрэглээний зээл дээр 45 хувь болгож чангатгасан. Мөн арилжааны банкны заавал байлгах нөөцийн хувь хэмжээг чангатгасан нь зээлийн төлөвийг хатуу түвшинд барьж ирсний илрэл. Хэрэглээний зээлийг чангатгаж байгаа нь эргээд банкны зээлийг хэрэглээний зээлээс бизнесийн зээл рүү шилжих боломжийг олгож байна. Энэ нь дунд хугацаандаа эдийн засгийн өсөлтийг тэтгэх, идэвхжлийг нэмэгдүүлэх бодлогын арга хэмжээнүүд юм. Төв банк дараа дараагийн улиралд ч гэсэн бизнесийн зээлийн хөнгөлөлтийг улам дэмжих бодлого баримтална. Өмнөх хурлуудаар гаргасан шийдвэр бол санхүүгийн тогтвортой байдлын зөвлөлийн гишүүн байгууллага болох Санхүүгийн зохицуулах хороотой харилцан ярилцаж бодлогын нийцтэй байдлаа хадгалсны үндсэн дээр гаргасан. Энэхүү шийдвэрийн дараа СЗХ хуралдаж банк бус санхүүгийн байгууллагуудын гаргаж буй хэрэглээний зээл дээр өр орлогын хязгаарлалтын түвшинг тодорхой нэгж хувиар чангаруулсан.  Төрөөс зохицуулахгүй байгаа иргэд хоорондын хувь зээл болон лизингийн үйлчилгээтэй холбоотой зээл бол анхаарлын төвд байна. Энэ асуудалд бусад зохицуулалтын байгууллагууд хамтарч бодлогын зохицуулалтыг хийж байна. Бид макро бодлогын зохицуулалтын хүрээнд мөнгөний нийлүүлэлтийг байнга харж байна” гэв.

Нийтэлсэн огноо2026-03-22